وسط الحريقة
احمد صبري
-
اد ماكنت محتاج لك
وبنده لك بقالي سنين
اد ماكنت بشتاق لك
وببعت لك غرام وحنين
اد ماكنت
برسم الاحلام عليك
بعشق الايام معاك
عيشت وموتت
م القساوة اللي ف عنيك
تعبت كتير عشان انساك
-
كام مرة قلبك خان
كام مرة هنت عليك
فكرتني باللي كان
كنت خلاص ناسيك
نسيت ايام زمان
وعذابي بين لياليك
مالقتش ليك امان
ولقتني خسارة فيك
-
تصدق ان انت قادر
وانا مابقتش ضعيف
الاحساس والمشاعر
عندك وهم وتخاريف
وعرفت انك شاطر
بتجرح بشكل لطيف
ولا همك اني شاعر
وقلبي نسمة صيف
-
جرحت قلبي كتير
وكل مرة بسامح
من نظرة كنت بطير
واتامل في الملامح
ماكسبتش منك غير
ندم على عمر رايح
والليلة فيك الخير
بتطمن وبتصالح
-
تسلم على سؤالك
اشكر عنيك الجريئة
طلعني من خيالك
مشاعري منك بريئة
إللي اذاك وسابك
حبيته بمية طريقة
وإللي ف قلبه شالك
رميته وسط الحريقة
