# سكة المساكين #
•• أشعار ••
عمادالدين العيطة
وأاااه ياسنين الأنين
قلبى الحزين حزين
على قهرة المساكين
ودايب حنين وحنين
بيقول يافرحة فين
سايبانا ورايحة فين
وسايبة دمعة عين
كأنها سكين ..
دمعة نارها نارين
والصرخة طالعة إتنين
مقسومة بين مرين
صرخة ع اللى جوه البلد
واللى إتقتل واللى إنجلد
وذنبه إيه الولد
يعيش يتيم مسكين
وصرخة برة البلد
شايلة أوجاع حلب
والحال هناك إتقلب
وبيقولوا .. وطنيين
وصرخة ندهت ع الزمان
إلحقنا. . سرقوا المكان
ودمروا فلسطين
كانت الإجابة إيه .. ؟!
عملوا حقوق إنسان
والرفق بالحيوان
وجوعوا الإنسان
وشبعوا الحيوان
والشعب شال الطين
ومهما أنده وأنادى
كأنى بأنده فى مالطة
مش فى بلادى
بتأسفلكم ياولادى
ندهت على ناس نايمين
من 48 ..
وعام وراء عام
عاملين زى النعام
غارسين رؤوسهم ف الطين
ومهما تبكى ياعين
هتبكى على مين وإلا مين
وإلا .. مين ..
ع اللى حصل ف البوسنة
و سيبنا العدو يدهسنا
ويحرق ف المسلمين
والجرح فينا علم .. لكننا
بننسى .. مش بنتعلم
ومهما نتألم مش بنتكلم
واللى حصل ف البوسنة
قدام عنينا يتكرر
في بورما للمسلمين
وإحنا مش سائلين
ومهما نعانى كإننا بنقرر
نحنى رؤوسنا تانى
ونحطها فى الطين