مافيش حقيقة مطلقة
والكون بيدعى العمى
مديت صوابعى ناحيتة
وحاولت المس السما
فالكون غضب
وقالى احذر انما
دة كل من شاف الحقايق
أتمنى انة يتعمى
فخوفت عليكى م العما
ياحوا نازلة من السما
ياام العيون الملهمة
يامخلفة كل البشر
وعاملة منهم أوليا
وانا مش ولى
كافر بحسنك فأنهلى
ياام العيون المخملى
ازلزلك. ..تتزلزلى
شيلينى زى الموج لفوق
ورجعينى. ..أرندلى
يانجمة طايرة فى الفضا ماتندهيلى
ياام النهود الحالمة .....حنى وميلى
خليكى ضى فى الضلام يشق ليلى
كونيلى مطرة فى العطش وسلسبيلى
كونى مرايتى وبوصلتى كونى دليلى
وغرقى قلبى فى ثبات
واطلقينى فى السكات
ونيمينى. .
جوة حجرك للممات
رضعينى زى طفل
من حلمة النجمات
أنعس وابات
فيا حوا مستورة بورق التين
دة ورق التين ياحوا ضعيف
تعالى فى حضنى واتدارى
لايجى جليد.. ﻻيجى خريف
واسقينى خمرك بالشفايف
وماتخافيش
ماتفكريش...!!!!
دة الفكر كفر
والعقل كفر....
ومنطقى ومنطقك
يبقى أسمة عهر
الفجر سكران وخارج يبتغى يروح
سندت علية الشمس وضهرها عريان
لمس خدودها اتململت سكرانة تتطوح
أحمر لونها خجل فصبغها بالألوان
فحبل غمام السما راح والد المطرة
لا بحبل سرى ولا ...بجماع انسان
وانا اللى سهران بينما
زغلولى طار لمس السما بالعرض
من كتر ماتاة فى فى الفضا
حط الرحال عالارض
فقاس حقيقة حلمنا
وسط الجليد والبرد
فلقانا حفنة وجع
متبحطرين عالارض
انا شفت مرة النحلة بتعذب الزهرة
وتغتصبها يوماتى وتشد منها رحيق
والزهرة فاتحة الورق وكأنها موافقة
والنحل لم يكتفى بالشهد فى الاباريق
يبقى الربيع حفلة كبيرة للجماع والسفسطة
ويغلطونى أن قلت أن الزهور سفاسيط
ياعم نوح..آية لزمتة بس الطوفان
الخلق حابة للغرق
لو حتى فلك ولة بيبان
ياعم نوح آدم اتولد. ومعاة شيطان
فسيبك من كل البشر
طبع البشر خوان
وكفاية يبقى معاك مجدى نصيف
من كل حيوان جوز
آدم وحوا فى الجنان
كانوا جوز
قايين قتل هابيل
رغم أن هما جوز
عبد إسرائيل العجل لما صعد موسى
واستهزؤا بهارون
وعملوا 100 اراجوز
مافيش حقيقة مطلقة بين البشر
فلما اقول انى بحبك مش خطر
ولما قلت بكرهك لو حتى كدب..
مش خطر
الكدب فى طبع البشر
وانا بشر
وانتى بشر
لاء مش بشر
لاء دة انتى فى عيونى قمر
لاء دة انتى فى كفوفى قدر
وانا قدر
ومافيش قدر يمنع قدر
عيدان القمح لو رافعة دماغها لفوق
تبقى السنابل فاضية مافيهاش قمح
يبقى الهوا بيمرجحة فى قلب طوق
ويسلموة للنار..أو يبعتوة للدبح
وانا سنابلى من تقلها طاطت وباست الارض
متحملة بالشوق ولامسهاش البرد
طب ياخليل الخلايل. .يلى انت قبلة وفرض
العشق والمعشقة. .مربوط برمية نرد
