لسه ناسى
********
كنت ماشى فى يوم طريقى
فجأه تاه منى طريقى
والتقتنى فجأه ضايع
ناسى بيتى فى أى شارع
قمت سائل حد ماشى
اسمى ايه ! أصلى ناسى
أيوه ناسى
ناسى اسمى
ناسى بيتى
ناسى أهلى
ناسى .. ناسى
ايه حكايتى ! فين تراثى
مين جيرانى وفين صحابى
رد قالى .. ايه حكايتك
فين بطاقتك
قلت : ناسى
حط ايده جوه جيبى
خد بطاقتى
ومن هنا بدأت حكايتى
الحكايه !
لسه عايشه جوه راسى
كنت فاكر انى عربى
حتى لغتى هى عربى
بس راسى فيها عبرى
حشو جامد مالى فكرى
والصداع أصبح تاعبنى
انا عربى ولا عبرى
كان شارعنا فيه عيلتنا
كل أهلى جنب بيتنا
والقرايب والحبايب
دول جيرانا
فجأة جالنا
حد عبرى
حط رجله فى بيت أخويا
وابن عمى صار صديقه
وابن خالى غض عينه
اصبح شارعنا مش شارعنا
واللى منا صار بايعنا
والخلاف اصبح صديقنا
كنا عيله وكنا لمه
كنا قوه وكنا أمه
صرنا عاله
الغريب عنا نلمه
والقريب منا نسمه
والعدو أصبح صديق
والصديق مابقاش رفيق
والوصال عمال يضيق
والغريب ناوى الحريق
واللى كان لينا شقيق
لسه ناسى !
إننا فى نفس الطريق
ننسى روحنا
والعدو يفرح فى نوحنا
والخديعه ! قال سلام
والسلام مش بالكلام
والكلام محتاج علام
والعلام دا للعقول
والقلوب ازاى تنول
والصفا محتاج قبول
يالا فوقوا يالا اصحوا
دا اللى واقف يبقى غول
نفس أفعال المغول
نفسه يلقى الأخ شارد
هو يبقى دراعه فارد
يحتوى الأخ اللى شارد
يحشى عقله
إنـــه مارد
يالا اسرق أرض أخوك
والقرايب دول خانوك
واحنا عينا مش عليك
والكويت هديه ليك
يملوا قلبه بالغرور
أصله واقف فى الطابور
والغرور بيزيد شيطانه
والخيانه عايشه جاره
فجأه جاروا
واللى غره راح لجاره
قاله انهض احنا ليك
احنا جيشنا لك حاميك
والعروبه اتقص عودها
والفتن ضربت عهودها
قالوا نووى وقالوا قاعده
والحبيبه الصهيونيه !
قاعده قاعده
انتوا عيشوا كالغلابه
هى تمرح كالديابه
والغراب منكم وفيكم
احنا ننهش !
وهو منكم بيواريكم
احنا أصحاب العقول
أمرنا لازم يطول
وانتوا أصحاب الأصول
مجدكم لازم يزول
الحكايه جوه راسى !
ولَّا هتهدوا تراثى
ولا أعمل تانى ناسى
والبطاقه دى أساسى
ولا أرضى مش مقاسى
لسه نـــاسى
ولا راسى ناسيه ناسى
ولاتاه عنى تراثى
ولا يمكن تاهو ناسى
مين يقولى هما فين
أهلى و نــــاسى
