( الحرمان )بقلم/ علاء زايد
==============
من زمان أيام ماكنا صغيرين
كنا حيارا وللحنان متشوقين
كنا بنضحك وفى الحقيقة
كنا بنخفى جرح فايتاه السنين
كنا بنحبس دمعنا والحزن عمره
مايتخفى دايما بيظهر ف العنين
كنا بنحضن جرحنا والليل عذاب
دايما نباته سهرانين
من كل حاجه محرومين من الحنان
من حب أب يدينا بيه الأمان
من حضن أم مش عارفه معنى الحنان
لكن بقى ح نقول لمين
لو قلنا كلمه يقولوا احنا متفلسفين
نكتم شعورنا ودمعنا نكتم ألم
وعذاب وقسوه مايمحيها فرح السنين
تكبر العقدة معانا ونبقى معقدين
عايشين فى زنزانة أنين
ضايعين فى دنيا المحرومين
تايهين بننده ع الحنين
نضحك واحنا المجروحين
ضحكه بهتانه مابين الشفتين
نرضى بيها الناس
ونقول دا احنا مبسوطين
وندارى عنهم جرحنا
كل واحد فيه كفايه
وهوه مين ح يشيل لمين
ودى قصة خمسه ماتوا
أيوه ماتوا من سنين
وقصة كل جيل
بين أب جاهل وأم جاهله
مش فى العلام لكن فى فن توزيع الحنان