طوق نجاة

آهين يا ليلى يا عين

طوق النجاه للوطن ..

يبقى الوطن دا لمين ؟

للشعرا و الفلاحين و خبازين العيش

ولا لصوص البنوك ،

و قطاعين السكك و النعسانين ع الريش

و الطوق يا عالم للنجاه ..

و لا عشان يطبق على الأرواح

يمكن يكون الوطن عشمان صحيح يا ولاد

إن البلاد تنتفض و القدس تتحرر

بس إحنا فين يا عم ف العولمه

نار الصهاينه بتاكل الشبان

و السبع بات شبعان

لسه الخطابه ف دمنا و مشغلين مكلمه

م الضفة جى الخبر يوماتى بالشهدا ..

و الطحن ف المفرمه

يا تكون نبى عصر البجاحه كلها

كذبنجى و مسيلمه

يا تخش بيت الخراب و بفن و بمعلمه

من حته تانيه هتطلع

و الروح تروح للسما

كتر الجراد ع الطريق يا رفيق ..

عفوا

ياللى كنت رفيق

زمن الرفاقه انتهى ..

و الطوق خناق بيضيق

رحت لطبيب المواجع ، قال :

آهين يا ليلى يا عين ..

دول حبتين ع الريق

طوق النجاه للوطن ..

يبقى الوطن دا لمين !؟