سنابل قمح فى خطوك .. سنابل قمح
و خير مبدور على قدمك ، و عز ، و فرح
و لو سألونى عن حبك : يطول الشرح
**
فى يوم ما عرفتك الأحوال بقت سهله على إيديكى
و طهرك فتح الموال : على عوده يلاغيكى
و بيتى و أرضى و الترحال : بقوا مطرح ما الاقيكى
**
بأحبك نبته مرويه ، نداها فيه يروينى
و طير راقد على إيديه ، جناحاته تدفينى
تنامى جوه فى عنيه : و أغطى عليكى بعيونى
**
يا طالعه زى نور الشمس .. فى أحلى نهار و أحلى عمر
و صافيه زى لحظة همس .. تهمس للورود تحمر
نسيت فى عنيكى لون اليأس .. نسيت وياكى طعم المر
د . محمد رمزى
ساحة النقاش