والحقيقة لفت نظرى حاجة مهمة بيعانى منها كل خريج جديد
انه بيعمل شوية اخطاء محترمة بتضيع منه افضل الوظائف وافضل الفرص وافضل المرتبات
حنركز عليها فى الموضوع ده وكل شوية حضيف خطأ من الاخطاء اللى بيعملها الخريجين
تحذير
بصوا عايزين نبقى صرحاء ومحدش يزعل
يعنى حتسمع كلام تقيل فى الموضوع ده
وحنتقدك
بس لازم تبقى فاهم ان ده علشان مصلحتك وعلشان تلحق تظبط نفسك وتنطلق باذن الله
حتقعد تدافع عن نفسك ولا تنقد كلامى وتجيب اللوم على المجتمع والحكومة ومبارك والاخوان
الكلام ده مش حيجيب نتيجة
الموضوع ده للناس العمليين اللى عايزين فعلا يتحركوا لقدام
مش يقعدوا يندبوا فى حظهم
اول غلطة وهى نظرية شوية بس نسخن بيها
اول غلطة بيعمل كل واحد هى
"اليأس"
الشاب وهو فى الجامعة يأس اساسا
ومعتقد ان البلد مفهاش شغل نهائيا
او فى شغل بس كله بوسايط
او فى شغل مش بوسايط بس بمرتب تعبان
او فى شغل كويس بس طالب خبرة
طيب وعايش ازاى يبنى بعد كل التفكير ده؟
فعلا البلد الشغل قليل فيها (بس مش معدوم نهائيا)
وايوه فى شغل بوسايط (بس ده الشغل الحكومى التعبان لكن الشركات الخاصة غالبيتها مبتاخش بالوسايط)
وايوه فى شغل بيهلكك وميدكيش مرتب عدل (بس دى البداية لغاية لما تروح لحاجة احسن)
وايوه فى شغل طالب خبرة (بس فى شغل كتير مش طالب خبرة...اومال الناس اللى معاها خبرة جت منين؟ مهو اكيد اشتغل يوم ومكنش معاه خبرة)
مشكلة اليأس ده فى ايه؟
ان الناس بتياس حتى انها تقدم
طول اليوم فى وظائف وتلاقى الشاب بيقولك لا مانا قدمت قبل كده كتير ومتقبلتش (ودى لسه ليها حلقة كاملة لوحدها)
او يقولك لا يعم مش حقدم مهى كوسة
او لا مش حقدم اصلى كده كده مش حقبل
انسى الياس ده من دماغك خالص واتحرك شوية
الشغل ده كانك فى أودة فيها الف باب ...995 باب منهم وهمى او ميناسبكش و5 منهم فيها كل الرزق)
لو خبطت على باب (قدمت فى وظيفة) واتنين وعشرة و100 برده لازم تكمل لغاية لما توصل للشركة اللى تديلك مرتب كويس وتتعلم فيها ومتبقاش بواسطة
ماشى طب انا مش يائس وقدمت فى وزارة العدل وفى الضرايب وفى الكهرباء ومتقبلتش
ونزلت لفيت على البنوك ومتقبلتش؟
هو انت فاكر ان التقديم ده حاجة كده بتعملها فى وقت فراغك
اول متخرجت قعدت سنة واكتر مشتغلش
عارف كنت بعمل ايه كل يوم؟
وظيفتى الرئيسية انى اصحى الصبح وقبل حتى مفطر افتح الانترنت ومحدد لنفسى لستة
بكام موقع توظيف على كام منتدى بيعرض وظائف على الاعلانات بتاعة الجرايد
وافرهم واحدة واحدة واول ملاقى وظيفة اقدم فيها فى نفس اللحظة
والموضوع ده كان لا يمكن يوم اعديه من غير معمله
واول حاجة فى اليوم
مش باليل بعد مخلص سهر
ولا بعد الغداء ولا فى وقت فراغى
ليه بقى؟
لان ببساطة جزء كبير مش عارف معلومة ان الشركة لما بتنزل اعلان وتبقى طالبين ناس بجد
بس بيجلهم الاف السيفيهات
الاف بمعنى كلمة الاف
طيب لو موظف الاتش ار قعد يفتح فى كل ايميل 5 دقايق يبقى انت بتتكلم فى حوالى 5 الاف دقيقة
يعنى اكتر من 100 ساعة شغل
يعنى بتاع 3 اسابيع ده لو مبيعملش حاجة غير انه يفتح الايميلات
وبالتالى عارف بيعمل ايه؟
بيبص على اول 100 ايميل بالكتير اوى
ويصفيهم لحوالى 20 سى فى يكلمهم ويعملهم انترفيو وشكرا على كده
طيب والباقى؟
معطلكش!!!!
يبقى حضرتك لما تيجى تقدم فى الوظيفة بعديها باسبوعين وتقول ايه ده قدمت ومحدش كلمنى يبقى الوظيفة وهمية
لا مش وهمية بس هما مش حيضيعوا فى وقتهم ويبقى الغلطة عندك انك بتتاخر فى الارسال
يبقى اول حاجة اعمل يوميا هى البحث عن الوظائف والتقديم فيها
وماشاء الله الايام دى ممكن تلاقيلك 30 موقع توظيف على منتدى توظيف محترمين فى مصر
الغلطة التالية:
مواقع التوظيف والجرايد دول كلهم وظائف وهمية
جرايد ايه ومواقع توظيف ايه اللى نقدم فيها؟ مهى كلها وظائف وهمية/دعاية/ او متعينين من الاول
انا سعيد انك سالتني السؤال ده
تعال نفكر بصورة عملية
عارف الاعلان فى الجرنال بيكلف الشركة اد ايه؟
عارف ان الاعلان الصغير ده ممكن يكون مكلفها 30 او 40 الف جنيه؟
طيب ياترى يا هل ترى ايه اللى يخلى شركة تروح ترمى المبلغ ده وهى معينة ناس فى الاول؟
وشرحه فى مواقع التوظيف ودى لسه ليها قصة لوحدها لكن مبدئيا النشر فى مواقع التوظيف ممكن يوصل لالف
طيب يعنى الشركة لاقية فلوسها فى الشارع
فى ناس بتفتى وتقولك اصل القانون بيلزمها انها تنزل اعلان!!! وطبعا ده فتى لان ده فى الجهات الحكومية فقط ومش كلها كمان
فى ناس بتقولك اصل الشركة بتعمل دعاية لنفسها!!!!
طيب واعمل دعاية بوظائف ليه طيب معمل دعاية لمنتجاتى علطول...يعنى الشاب اللى لسه متخرج وبياخد مصروفه حعمله دعاية حستفيد ايه
تانى حتقول مانا قدمت كتير فى وظائف الجرايد ومتقبلتش
راجع التعليقين اللى فاتوا وانت حتفهم مبتقبلش ليه
الغلطة التانية
عملت كل اللى قلت عليه وببعت وحتى مبيكلمونيش للانترفيو؟
ياترى الناس اللى راكبة عربيات وعندها شقق جايبة الفلوس دى منين؟
هل كلهم وارثين ولا تجار ولا فاسدين
ولا فى ناس كتير منهم بتشتغل فى شركات كبيرة بتدى مرتبات محترمة تخليهم عايشين مستريحين
هل يعقل ان مصر مفهاش حتى 10% من الشركات محترمة؟
هل القبول فى الشركات دى كلها بالوسايط
لو النسبة دى موجودة يبقى هما دول اللى حركز عليهم لغاية لما اقدر اوصل لحد فيهم...لكن حفضل احبط فى نفسي مش حطول حتى الشركة الاى كلام
الشركات الكويسة موجودة ومش دايما بتبقى طالبة لغة وكومبيوتر (وعلى فكرة النقطة دى لسه حتيجى فى كلامنا انك متخافش لما تلاقى شرط زى ده ولازم تقدم لان ساعات بتبقى اسطمبة مكتوبة وخلاص ولا هما مهتمين بيها وممكن يقبلوك) ولسه موضوع المرتب اللى يدعو للسخرية ده حنجيله برده
