"علمني ربي ... الرزق بيد الله"

ايام الثانويه العامة كنت باخد دروس فى كل حاجه تقريبا إلا التربيه الوطنية
و كنت باخد الدروس مع اتنين بنات اصحابي فى البيت
بجد ايام حلوه كان الواحد بيشغل دماغه وبيحفظ ويذاكر رغم رعب الامتحانات اللى ملوش حل. و بعدين تتوكل على الله وتلاقى الامور سهله وبسيطه
تذاكر و تتعب و فى ليلة الامتحان تلاقي كده قلبك بياكلك عايز تراجع حاجه محددة
و متعرفش تنام غير لمه تراجعها وتصحى الصبح تلاقي الحاجه اللى راجعتها هى اللى جت فى الامتحان وكان ممكن متراجعهاش او تلاقي ورقه مع صاحبك بيراجع قانون معين فتراجعه معاه وتلاقيه فى ورقة الامتحان ...بس لان والدتك دعيتلك قبل ما تنزل الامتحان

كريم يارب ..

المهم فى الايام دي ساعات المدرسين كانوا بيحبوا يرفهو عننا شويه لما نعمل حاجه كويسه او نجاوب سؤال صعب او نسمَّع صح مثلا .
المهم اليوم ده كان درس لغه عربية
وتقريبا جاوبنا كويس و فرحناه اخيرا "وادخلنا السرور على قلبه بعد ماكان تاعب قلبه معانا وتقريبا كان قرب يفقد الأمل فينا "
قرر انه يكافئنا ...
تفتكروا ازاى ؟

كل واحده فينا أخدت ربع جنيه ورق محترم قبل ما يتخرم
و الاستاذ كتب لكل واحده فينا كلمه وكتبلي " تلميذتي المهذبه الخلوق " مش ناسياها اتمنى اكون كده يارب.
اخدت الربع جنية و كالعادة ان اى حد ياخد فلوس مكتوب عليها من حد لازم يشيلها و مايصرفهاش ذوقياً يعني
مع انى مش بحب اكتب على الفلوس عشان ده اهدار للنعمة اللى ربنا انعم علينا بيها.
المهم عشان مطولش عليكو ...


بعد الدرس احتفظت بالربع جنيه فى مكان أمين للذكرى.
وبعد يومين فى المدرسه فى الفُسحه كنت انا واصحابي "البنات" متجمعين عشان ناكل مع بعض السندوتشات او الحلويات و المشروبات والشيبسي بقا و الحاجات الغريبه التانيه اللى بيقولو عليها سناكس...


فبعتنا واحده صاحبتنا بالفلوس تروح الكنتين -( محل صغير فى المدرسه يبيع للطلبه فقط )- وكل يوم واحده بتروح تشتري بالدور و اخدت الفلوس و راحت تجيب لنا التموين بتاع الفسحه

البنت دي كانت من البنات اللى بتاخد معايا درس اللغه العربيه و هى كمان اخدت الربع جنيه الورق المحترم .
المهم هى راحت و احنا قعدنا نستناها نسلي نفسنا على ما الاكل ييجي
و لقيتها راجعه و مش معاها اى حاجه و متوجهه نحوي بوجه كله إستغراب وتعجب و بتديني الربع جنيه اللى الاستاذ كتبلي عليه اسمي و كلمة الشكر و التاريخ
و قالتلي ده بتاعك ايه اللى جابه مع اسراء !!!

اسراء دي بنت من اللى كانو معانا فى الشلة
و كان معاها الربع جنيه بتاعى اللى الاستاذ كتبلي عليه
ازاي معرفش !! ازاى وصلها اصلا ؟
المهم اخدت الربع جنيه منها وفعلا هو الربع جنيه بتاعي اللى المفروض اني شيلته فى البيت فى مكان أمين. حسب ماانا فاهمه
سألتها و كأنها مثلا سرقته مني

ايه اللى جاب ده معاكي يا اسراء ؟

البنت اتخضت و قالتلى اخدته باقى من البقال امبارح !

وهى فاكراه كويس لانه مكتوب عليه فشكله مميز
قلتلها ده الاستاذ كتبلي عليه فى الدرس وماضي عليه كمان فى الدرس من يومين
اخدته تاني منها و اديتلها واحد مخروم
انا طبعا طول اليوم مش فاهمه ايه اللى جاب الربع جنيه ده معاها او بمعنى اصح ايه اللى خرَّجه من البيت اصلا وخلاه يروح للبقال اللى اصلا مش جمب بيتي
وبعدين يروح لصحبتي اللى تجيبه معاها وتدفعه لصحبتنا اللى بتروح الكنتين عشان يرجعلي تاني


طيب ليه ده كله حصل؟


طبعا كلكو عايزين تعرفوا ازاى ده حصل !!
مش هقدر اقولكم بصراحه
لأن انا مش عارفه ده حصل ازاى اكيد فى سبب بس انا معرفوش
بس السؤال اللى عرفت اجابته
هو ليه ده حصل ؟

ببســــاطه ان الربع جنيه ده كان رزقي


ياجماعه رزقنا هيجيلنا هيجيلنا من غير ماتعرف ازاي

تفتكروا لو كنت شغلت نفسي ازاى ده حصل وقعدت ادور على الاسباب كنت هتعلم حاجه ؟
اكيد لأ ...بس لما سألت نفسي ليه ده حصل اتعلمت كتير اوى
متفكرش فى ازاي ربنا هيرزقني لان دي مش شغلتك الرزق مكتوب و هييجي هييجي لان ربنا كتبلنا الرزق من زمان اوى
رفعت الاقلام وجفت الصحف
من ساعتها مبقتش اشغل نفسي بالرزق او بأى حاجه لان الموقف ده علمني كتير اوى
ان مهما كانت الأسباب مش واضحه ومش فاهمين حاجه ربنا له حكمه وله تدبير لكل واحد فينا و رزقنا مكتوب لنا المهم مانفكرش كتير فيه غير اننا ناخد بالأسباب
و انا لما حافظت على الربع جنيه اول ما أخدته كان سبب فى الحفاظ عليه بس بطريقة تانيه ساعات تاخد بالأسباب و تتعب نفسك وربنا يفتح عليك من حته تانيه خالص وده معنى


وَيَرْزُقْهُ مِنْ حَيْثُ لا يَحْتَسِب

اذا كان ده ربع جنيه مكتوب عليه للذكرى وعشان كان رزقي رجعلي تانى
تفتكروا ممكن اقلق على رزقي من المال اللى هو مهم عشان نعيش وناكل ونشرب و مش للذكرى يعني

تفتكروا ممكن اقلق على رزق الزواج أو رزق الصحبة

ازاى ممكن أقلق على رزق العلم اللى مهم عشان نعرف نقرب من ربنا اذا كان علم أخروي او دنيوي
و الاتنين مهمين جدا عشان ندخل الجنة

ازاي ممكن ييجي يوم و انكد على نفسي أو اتخنق من تأخير أى نوع من انواع الرزق اللى خلقها ربنا

متأكده وواثقه و عندي يقين أن الرزق اللى من نصيبي مكتوب و هيجيلي و انا سعيده ومطمئنه بهذا الاعتقاد
اللى غير حياتي و ازال الكثير من عقبات تضيع الوقت على القلق على الرزق
وبفكر فى حاجات تانيه انفع ليه و لغيري -اتمنى ان اكون كذلك و اسال الله ان يعينني على ذلك -

اللهم ثبتنى على مارزقتنيه من العلم بهذا الموقف البسيط و يارب أنر بصيرتي لكي اتعلم من كل لحظه فى حياتي 
الحمد لله رب العالمين