عصفور أسمر صغيّر
بأشوفه فوق السطوح
أبص له يتحيّر
خطوته تيجي وتروح
ترفرف ايديه
تبربش عينيه
قال ايه!... مكسوف
ف يوم راح ضحك لي
اتأكدت لمّا شاورلي
ومن غير احم ولا دستور
بادلته نفس الشعور
بان من خده السرور
و راح ابن الايه
جمد قلبه الرهوف
عصفور أسمر صغيّر
سماره بلح زغلول
نضاره وجماله بتول
مجنناني عيونه الكحيله
ضفايره الليلي الطويله
ملامح جسمه النحيله
وكان مايغلبشي حيله
ف المشاوره
والمناوره
بشقاوته الجميله
وايه
مهما تكون الظروف
عصفور أسمر صغيّر
ف الصبح يسعدني بصباحه
بالليل يزيد من مراحه
و ف مره بالمشاوره
طلب اني أقابله
اعتذرت
وطلبت منه الهدوء
افتكر اني مش قابله
واختفى بين الشقوق
خيّمت الوحده فيّا
عشعشت دمعه في عينيّه
وكل اللي يسأل مال عينيّه
أقول ايه
ده بس رمشي مطروف
عصفور أسمر صغيّر
( تمت ) ... توقيع/ أنسي المصري
ساحة النقاش