محدش فينا يقدر يعيش من غير حب حبنا لاهلنا , حبنا لاصحابنا, حبنا لأولادنا,كل دا جميل لكن الاجمل

انك تحب حد وتحلم انك ترتبط بيه ويبقى كل حاجه فى حياتك
وتفضل طول اليوم تفكر فيه وتحس انك كل ثانية عايز تكلمه وتعرف أخباره اول بأول.
وتحس انك لو فضلت طول عمرك تبصله برضه هيفضل واحشك.
بتفرح جدا لو سمعت انه اتكلم عنك كويس من وراك وتزعل قوى وتكره نفسك لو كان زعلان منك .
 وتفضل كل يوم تقول بكره هقوله انى بحبه وتفضل تتخيل هو هيكون رده ايه...؟؟

تخيل لو اتسرعت قبل ما تتاكد من حقيقة مشاعرك وكان ردك انك انت كمان بتحبها هيكون رد فعلها ايه ..؟

 اكيد طبعا هتكون ف غاية السعادة لدرجة انها ممكن تحس انها طايرة بجناحات في الهوا مش واقفة على الارض .

وهتبدأ تحلم وتحلم .... وتستنى اليوم اللى يتحقق فيه الحلم .

وفجأة........!!!

تقولها اننا اتسرعنا في الحكم على مشاعرنا واننا خلاص مش هينفع نكمل ومن غير ما تقصد تقتل جواها كل احلامها كل فرحة عاشتها وكانت بتحلم تعيشها وكل ده ليه ..؟

عـــارف ليـــــه؟

لأنك اتسرعت .....!

طيب ليه..؟ قبل ماتكون السبب ف دمار حياة انسانة ملهاش اى ذنب غير انها صدقتك ووثقت فيك.. قبل ماتخليها تفقد الثقة في نفسها وفي كل الناس .. قبل ما تخليها تشوف الدنيا من ورا نضارة سودا......... فكر ألف مرة قبل ما تهدم كل احلامها قبل ما تخليها مش شايفة ادامها قبل ما تكون السبب في وجعها وألمها...

ليه متفكرش الف مرة قبل ما تكون السبب في كل ده ...؟

وتسأل نفسك.........؟

هل ده حب ولا اعجاب؟

ولا لأنك عايش في حالة فراغ عاطفي فأى حد جه في سكتك حسيت انك حبيته؟؟
مش الاول وقبل ما تقول لحد انك بتحبه تسأل نفسك اذا

هو ده الشخص المناسب ليك ولا لاء ؟؟؟
طب سألت نفسك هل ممكن تندم فى يوم من الأيام أنك حبيته ؟؟؟
 سألت نفسك ..أخرة الحب ده ايه ؟؟؟

عندك استعداد ترتبط بيه وتكمل معاه مشوار الحياة؟؟؟
طب اتأكدت ان الانسان ده صفاته وطريقته فى الحياه متوافقه معاك ولا لاء قبل ما تندم؟؟؟
سألت نفسك أنت بجد عايزه ولا لاء ؟

 وحبك ليه ده هيستمر على طول ولا فترة وهتعدي بمرور الوقت؟؟؟؟؟
الأول قولى انت مستعد انك تضحى علشان الشخص ده ولا لاء؟؟؟

انت عارف انك بمجرد ما تقول لحد انك بتحبه وهو يبدى موافقه على الامر أنك مبقتش مسئول عن نفسك بس..لا..!! انت بقيت كمان مسئول عنه؟؟
هتقدر بعد ما يوافقك على الحب انك تشيل من كلامك ومن تصرفاتك ومن افعالك كلمة "أنا" وتحط مكانها كلمة "احنا"؟

تعرف ان الحب الطاهر نهايته الزواج ؟؟؟ ياترى بقى إنت قد المسئولية دى؟؟

حاسس انك مش مراهق؟؟
طب تتخيل ربنا راضى عنك وعن طريقه حبك دي ولا مش راضى ؟؟؟
 فكرت كويس فى الأنسانه اللى ناوى تقولها بحبك لو طلعت مش بتحبها بجد حياتها هتبقى أزاى؟؟
طب فكرت فى حجم الألم والدموع اللى ممكن تتسبب فيها للبنت دي؟
 فكرت فى البنت دي على اساس انها انسانه وبتتجرح زى اى حد وبالعكس ممكن تكون بتنجرح اكتر من اي حد ؟؟
قبل ما تقول لحد بحبك أسأل نفسك كتير الأسئله دي وحاول تجاوب عليها .
ولو معرفتش تجاوب يبقى استنى ومتتسرعش لحد ما تلاقى أجابات وتكون انت مقتنع تماما بيها.

الحب مش مجرد كلمة بنقولها وقت ما نحس اننا محتاجين نقولها .

الحب قبل ما يكون احساس وكلام بين أتنين هو مسئوليه وقبل ما تحب لازم تتأكد أنك قد المسئولية دي .
فيه قصص حب كتيرة اوى بتنتهى بمجرد ما تبتدى لأنها اتبنت على اساس خاطىء .
ومتقولش أيه يعنى احب وأجرب وأسيب وأرجع احب تانى وأجرب لحد ما اتعلم .

بنات الناس مش لعبة ولا حقل تجارب بتعمل فيه تجاربك لحد ما تنجح وتوصل للنتجة والاختيار الصح .

فكر مليون مرة قبل ما تنطق الكلمة دى لأنك ممكن تتسبب فى هدم حياه انسانه معملتش فيك حاجه وحشه فى يوم من الايام.
واوعى تقول انها مش هتفرق معاها لانها كانت وحيدة قبل ما تعرفنى وكانت عايشة كويسة..؟؟ صدقنى .. حتى لو كانت عايشة قبلك وحيدة وكانت مرتاحة في حياتها ... عمرها مهتقدر تانى ترجع تعيش زى ما كانت لأن الانسان لو عاش طول عمره في وحده ودق الحب قلبه وعرف يعني ايه حب ؟
 مش هيعرف  ولا هيقدر ابدا يرجع يعيش وحيد تانى.

وعشان كده بقولك فكر الف مرة واوعى ابدا تتسرع في الحكم على عواطفك واعرف ان الراجل لازم يكون اد كلمته  وان كل كلمة هتقولها محسوبة عليك .وانك بكلمة واحدة ممكن تخليها تحس انها ملكت الدنيا ..وبكلمة واحدة برضه تخليها تحس انها فقدت كل شيء في الدنيا.

ولذا .......

فعليك بالتفكير ثم التفكير ثم التفكير قبل ان تفعل شيء تندم عليه وقت لا ينفع الندم .