" كفاياك يا دنيا بقى "
****
لسه عايزة منى ايه؟
بتجرحينى تانى ليه؟
ما أنا كل حاجه سبتهالك
حتى قلبى قسيت عليه
خدتى منى كل حاجه
لسه عايزة تانى ايه..!!
خدتى منى فرحتى..
وحبى ليك وضحكتى..
ومسبتليش غير دمعتى
وعذابى اللى عايشة فيه
نفسى مرة افهمك
وتكلمينى واكلمك
لحد امتى هكلمك..
من غير ما حتى تعبرينى
طب مرة واحدة كلمينى
او حتى حاولى تسالينى
مش كل حاجه تعمليها...
من غير ماحتى ترجعيلى
حاولى مرة تفهمينى..
ليه معاك بتظلمينى؟!
ومن حلاوتك تحرمينى؟؟
كفاياك بقى.....
ارجوك ارحمينى
نفسى مرة تفرحينى
وتبطلى بقى تجرحينى
وتحاولى انك تسمعينى!!
دا أنا كل حاجة منى راحت
كل فرحة فيا ماتت
كل كلمة حلوة تاهت
حتى الدموع من عينى زالت
من كتر جرحك والاسية
مبقتش عارفة إيه اللى بيا؟
فيك الغلط ولا أكيد فيا
اللوم عليك ولا بقا عليا
لسة عندى تانى إيه؟
بتخططى نفسك تخديه؟
صدقينى.......
مبقاش معايا أى حاجة
ولا حتى جمبى أى حد..
تحرقى قلبى عليه
كل حبايبى ضاعوا منى
حتى أصحابى بعدوا عنى
وبقيت انا معاك لوحدى
مش لاقية حد يريحنى
ولا لاقية حاجة تفرحنى
وأقل حاجة بتجرحنى
والجرح منك مين يداويه..؟؟
عايشة ف حياتى وحيدة
ماشية ف طريقى شريدة
مش عارفة انا رايحة فين؟
ولا فاكرة جاية منين؟
ولا حتى بسأل.....
هيكون فيه إيه بعدين؟؟
ماشية وخلاص ف الدنيا
مش شايفة نور ف طريقى..
ولا لاقية حاجة حقيقى..
مش شايفة غير اوجاع
مش لاقية غير كدب وخداع
مبقتش أقول غير كلمة وداع
كل حاجة بقت مصيرها للضياع
حتى الأمل عمرى ف يوم ماحسيته
ولا عشت بيه..لكن ف يوم اتمنيته
حلمت بيه كتير واستنيته
وفضلت استنى واستنى
واصبر نفسى واتمنى
إن الأمل يجى ف يوم
إنى أحس بطعم النوم
واعيش شوية من غير هموم
لـــــــــــــــــــــكن....
حتى الأمل مخاصمنى
ودمع الندم ملازمنى
إيه يا دنيا...
لسه عايزة تانى إيه؟
كل دا مكفاكيش
عذابى ده مايرضيكيش
كفايانى كده
ولا انت ايـــــــــــه....؟
مبترحميش...!!!
سبينى بقى ..سبينى أعيش
سبينى أعيشك بقا
وأدوق معاك طعم اللقا
وأنسى طعم الفراق
انسى الجراح وانسى الاسية
وامسح دموعى اللى ف عنيا
والاقى حبيب ياخد بايديا
وأعيش معاه سنينى اللى جاية
من غير جراح ولا ندم ولا أسية
ولا حتى دمعة تنزل من عنيا
لا اسمع كلمة تجرحنى
ولا حتى نظرة تبكى عنيا
أتمنى تكونى فهمتينى
وقررتى اخيرا ترحمينى
ومن حساباتك تلغينى
وزى ف يوم ما ضيعتينى
ضيعى منــــــــــــي...
ودعينى ...ودعينى!!!
@"Monna"@
ساحة النقاش