#عادي

انا الصابر و مش راضي ..

انا العايش على الفاضي ..

انا اللي مهما عمره يفوت ..

ويجي الموت بقول عادي

********************

انا المالك وانا المطرود ..

انا الميت وانا مولود ..

انا اللي مهما اقول واعيد

حلمي بعيد واقول عادي

********************

انا شيخ ملوش اتباع ..

انا الشاري وانا باتباع ..

انا اللي مهما حقه يضيع ..

عمري ما ابيع وده العادي

********************

انا طير و مش طاير ..

انا اللي تملي بتعاير ...

انا اللي مهما اكون مهموم

بعدي اليوم واقول عادي

********************

انا الظاهر و مش باين.....

انا الداين و متداين......

انا اللي مهما ادوق المر .....

بعمل حر.... واقول عادي

********************

انا تابع و مش متبوع.....

انا صوت و مش مسموع....

انا اللي مهما اكون مكسور ....

ابان مستور .... و اقول عادي

********************

انا الصح و انا الخايب

و انا اللي تملي بتعايب

انا اللي مهما اكون مجروح

ب شهقه روح بقول عادي

********************

انا الضاحك علي همي.....

انا الشايف و متغمي ...

انا اللي مهما ف عمره يشوف

عذاب أو خوف بقول عادي

********************

انا الصاحب و مش لاقي......

انا الضايع و انا الباقي.........

انا اللي مهما اكون تعبان

ابان فرحان و اقول عادي

سيد صادق