( طلب تحويل )
مع نفسي قاعد يعني
وسارح في النجوم بالليل
لاقيت قلبي جاني فجأة
مقدّملي طلب تحويل
بيقول يا توافق وترضى
يا إما ماليش معاك قاعدة
وتثبت كل ده بإمضا
وبردوا هطلُب التبديل
سنين وياك عايش مظلوم
وبَنبُض حتى لو مقسوم
قراري خلاص بقى محسوم
ماينفعشي فيه التأجيل
ولمّا ناديتُه وسألتُه
عشان أعرف سبب حيرتُه
لاقيت أقنعني بكلامُه
ف يومها بجد أنا عذرتُه
لاقيته بيشكي م الوحدة
و م العُزلة وم القاعدة
سنين فاتت كتير يعني
ماحبش فيها يوم واحدة
بيقولّي حكمت على موتي
قابلت كلامُه بسكوتي
ف قاللي خلاص كده خلصت
وحان الآن سماع صوتي
بحُسن النيّة وبصدقي
مشيت وياك لآخر الدرب
كأنّه يعني مش حقي
بإني أدوق حلاوة الحب
ماعشتش عمري وشبابي
كأن الحب مش ليّا
قفلت عليا ليه بابي
وقولت الحب تضحية
وناس بتشوفه وقت فراغ
وناس بتاخدُه تسلّيه
أنا مايهمنّيش الناس
ولا أيه حصل ليهم
أنا نفسي أعيش إحساس
وأدوق الحب زييهم
قراري أنا سييته قدامك
سنين عايش بأفلامك
تسيبني براحتي ومزاجي
وأحب وأعيش وأروح وآجي
أعيش وياك وخدامك
تقوللي كاني أو ماني
و ده لمصلحتي وعشاني
هقول مصلحتي عارفها
وسكة جديدة شايفها
ف شوفلك قلب من تاني
بقلمي عبدالحميد وهبه
27/8/2023
