( قراطيس لب ) م / عبالحميد سالم
أنا ياخوانا مش شاعر ولا ساحر
ولا غصت مرة ف بحور الشعر والأوزان
دا بيت واحد من شاعر قادر يغرقنى
ولا اعرف أوصل لشطره م الحيرة و التوهان
******
انا نظم الكلام كله واخده بالعافية
ويدوب اعرف أرتبه وأوحد القافية
وكل اللى فاكره بس من نحوى
كان وأخواتها وحروف الجر والأزمان
وأى خاطرة تطق ف دماغى
باكتبها بعفوية بدون رمزية أو ألحان
*****،،
منا ياناس ف الشعر مش خباز
لكن باعجن كتير زى بعض الناس
واللى ساعات يجننى
إن صحابى فاكرنى أديب فنان
وخايف اطمع و الفكرة تحلالى
أقوم مجمع كل أفكارى
وأطبعهاواتمنظر على اصحابى
أنا يا شلة بقيت شاعر وليا ديوان
****،،،
وياخوفى على اللى كتبته ف كتابى
القاه تانى يوم مرمى قصاد بابى
أو عاملينه قراطيس لب ف الدكان
و ذنبى انى مهندس ومش شاعر
وولعى بالحرف والقافيةعامللى جنان
