( عشق البلد ) م /عبالحميد سالم
بنعشق ترابك يا بلد
مهما العيشة بقت مرار
ولو بقيت الأرض جنة
بعيد عنك هتبقى نار
مصر المحروسة دا اسمها
وجدودنا صنعوا مجدها
ولحم اكتافنا من فضلها
وهتفضل على طول الامد
نبض العروبة وأغلى دار
******
مصر الحضارة والتاريخ
قسيس وكنيسة جامع وشيخ
هلال وصليب متعانقين
رغم كيد الخائنين
دول نهبوها ومصوا دمها
هربوا وعايروها بفقرها
لكن ربك قادر على نصرها
طول م ولادها ليها السند
هتعدى المحن وتروح لانتصار
*****
لا ارهاب عمره هدها
بالعكس وحد صفها
وان راح شهيد منها
مليون غيره بيتولد
يفديها عشان تفضل عمار
لأنه عاشق تراب البلد
ولا يرضى يسكن غيره دار
