يا .....يـــو ســـــــف
&&&&&&&
نجوع ازاى ؟
وتحت إديك خزاين مال
وبين رجليك بتجرى المية
فى الأنهار
وسلطانك ..وجاه جاهك
يكفوا الكون
يا يوسف ...قوم
وشوف اللى بيتحاربوا
على أرضك ...على كرسيك
على ملكك
وهدوا حطان بنيناها
حيطان سبعة
نشوف الحق فى عنيهم
وشايفينه
لكن عميان
قميصك كان بدم الزيف
وبيصبَّـر
يبَـرّد شوق عيون يعقوب
ودم الحق ع الأسفلت
عاميهم
وعينهم شايفة بالمقلوب
زرعنا السوس مكان القمح
طَـرح غِـربان ودود ياما
وخزننا الأسى والجرح
وشلناهم
لسَـبع سنين
أكيد جايين ...بمر وملح
وسبعة ياكلوا فى السبعة
وسبع هناك ورا الزنازين
بينعى الفرح
وأولادك ...وأحفادك
بقُــم سلعة
وشمساية بتحلف ميت
قسم ويمين
ما هيش راجعة
وأرض ..البرد جَـمِّــدها
لا تِـقبل بذرة الغلبان
ولا ميَّـة بترويها
ومليانة بنَـبت شطان
وكل ثمرها من كوابيس
يا يوسف يلا
خلَّـصنا
وحصن أرضك اللى ف يوم
كانت مَـرعى
تكيَّـة للى ما يزرع ولا يقلع
ودلوقتى بيحفر بير
يطلع منه ميت برميل
بقايا من روث إبليس
يا يوسف ..شوف وصلنا لفين ؟
وكِـيل الناس
طَـفَـَـح بالمُـرّ
ومايلة كفِّـة الموازين
وفين ملكك وفين أرضك ؟
وفين شمسك
وجاية ولا مش جاية ؟
نجوع ازاى
فى أرض الخير وملك كتير
أكيد الظلم بيجوع
وكرسى الملك لو كّـلنا ؟
لا بيشبَّـع ولا بيِـقـنَــع
وكل اللى بيوصل له
بيحتلّـه
يا يوسف خد
خزاينها
وبعتَـرها
وسيبها لى
وهات لى ضمير يحاسبهم
وهات لى جرئ يحاكمهم
............................
بـــقـــــلـــــــم ا لـــشــــا عــــــــر
أ بـــــو عـــمــــــــا ر ا لـــمـــصـــــر ى
