انتهى زمنك معايا
للشاعر : محمد ضباشه
راحت عليكى خلاص
وانتهى زمنك معايا
والعيون اللى باعتنى
لازم تبكى ورايا
وبعدى تدوق الكاس
وتدور على حاجة فيه
ماهتلاقى غير جراح
ودموع ساكنه فى عنية
وقلوب مكتوب عليها
خسارة فيكى حبى
وخسارة أنى عرفتك
وقضيتى عمر جنبى
مليان مرار وحيرة
ودموع ملت البحور
وغيوم على كل قلبى
وحجبتى عنى النور
وعوزانى أقول بحبك
يا شيخة حبك يغور
وتغور كل الليالى
وتغور كل السنين
اللى اتعلقت فيها
وبقيت انسان حزين
بقلب عيونه عامية
ما شاف منى الحنين
ولا عرف بقدر حبى
ورمانى للزمان
وسراب ماجبش أخره
مفهوش ذرة أمان
وقلبى عاش وصبر
ويدور على اللى كان
ويا ريته ما حس بيكى
وبحبة فيكى اتهان
خلاص مات السكوت
وصراخ بيملى الكون
بيلعن أى حب
جوه القلوب بيهون
وبينصح كل عاشق
أوعى تكون مجنون
وتحب زى منى
وياخدك شبح ملعون
ماهو خدنى قبل منك
وكنت بيه مفتون
طلع عذار وقاسى
وكأنه ما عاش معايا
وما شوفت منه حاجة
غير جرحى وأسايا
مبروك خلصت حكايتة
وكفايه عليه منايا
أن عيونة اللى خانت
لازم تبكى ورايا
وليها رسالة منى
انتهى زمنك معايا