حتى السما
حتي السما
مبقاش عاجبها طبع البشر
عماله تبكي
ودموع عينيها زي المطر
الأخ هان عليه أخوه
والحق مات وبيدفنوه
ومفيش ضعيف بيرحموه
كل القلوب زي الحجر
حتى السما
مبقاش عاجبها طبع البشر
مات الضمير
والشر جوانا إنتشر
والشياطين
على بابنا واقفه تفتخر
الدم ناس بيحللوه
والسم كاس بيشربوه
والدين بيتلعن أبوه
وبيتلعن زيه القدر
حتى السما 
مبقاش عاجبها طبع البشر
شجر النخيل
دبلت جذوره 
وخلاص وقع منه الثمر
حتى الورود 
بقى لونها شاحب
مبقتش تلفت النظر
إتغيرت كل الوجوه
الكره ساد وعمموه
والظلم عم وكرموه
والخير معرض للخطر
حتى السما 
مبقاش عاجبها طبع البشر
عماله تبكي
ودموع عينيها زي المطر
بقلم /طارق شامخ عبد الجواد