//ما تعقدهاش\\ كلمات محمود وحيد
==================
عيش حياتك يا جدع
وبلاش تعقدها
واضحك على كل الوجع
ضحكك ما يوجعها
ريح دماغك م الحساب
العمر والرزق ف كتاب
لا فقر ضيق ف السنين
ولا ملك وسعها
=================
الدنيا طول عمرها
ساقية ودوارة
بتعلى ناس وتوطى ناس
خاينة وغدارة
فاركب عليها واتكل
واقوى على كل العلل
ارضى وعودها الرضا
دا النفس أمارة
==================
عيشها بطولها وعرضها
طول منها ما تطولك
وبلاش تحايل قلبها
ما يهمهاش قولك
كمل خطاوى سكتك
عيش الدموع عيش بسمتك
اقبلها كيف ما تكون وعيش
قدرك وهينولك
=====================
العمر مهما يطول ساعات
والوقت بيعدى يفوت
كام من وليد عاشها ومات
يعنى النهاية فيها موت
على ايه نضايق نفسنا
ونعيش علينا وضدنا
اضحك وعلى ضحكتك
حرر حياتك م السكوت
==================