جاى العيد
$$$$$$$
هى ساعات 
ويهـِـلّ العيد
مين جاب هدمة جديدة مقاسه ؟
مين هيجيب كفن الأموات ؟
مين رايح يدفن إحساسه ؟
ويكفن باقى الأيام ؟
مين هيكبر ؟
مين هيطبل ؟
مين مات صوته مع الحكايات ؟
مليون مين ؟
مالهمشى إجابة
وانتِ الـ ...مين الباقية ف عُـمرى
يا تجاوبينى تطمنى قلبى 
يا تطرزى كفنى ...بآهات
جاى العيد 
هيلاقى مين مستنى يعَـيّـد
مين بيعارض ؟
و يعارض ايه ؟
مين مش عارف
ليه بيؤيد؟
مين بيلملم جرحه ف قفة ؟
مين بيعلى ف عضم جِـتَـتنـا ؟
مين متيمِـم بتراب رجلك؟
مين متوضّى بدم اخواتنا ؟
جاى العيد
عيد متلون لون أحزاننا
لو كان ينفع 
كان بقى لونه 
زى علمنا 
يوم بالأبيض..نحلم بيه
يوم بالدم الـ عايمين فيه
يوم بحداد لبواقى كلامنا
هو دة عيدنا 
مهمن قلنا وزدنا وعِـدنا
عيدنا مخطط 
كنت اتمنى 
يكون متظبط
لا هو ضيق يخنق فرحتنا
ولا واسع يفضح عوراتنا 
عيد ويعدى
جاى متسربع أوى على موتى ؟
ولا على الزنزانة يهدى 
.............
بـــقـــلــــــم ا لــــشـــــا عــــــــر 
أ بــــو عــــمـــــــا ر ا لــــمـــــصــــــــر ى