رفع الجنود العَـلم
..................................
رفع الجنود العلم فوق غُرة السّـــــــاري
حضن الآذان قبلته وأُسْتُشهد الغالــــي
الفجر قام م الصلا يمسحلى أحزانــــي
داكان كلام جِدِّتى بتحكي عن ( خالي )
سينا ياقلب الوطن يابلسم لأشــجاني
الرمله تنادي الرملة وتحلف وبالــــغالي
.....
اتبَسِّم شهيد الوطن وعيونه بتـــغـادي
يزرع رايات الأمل وبعشقها ينـــــــــادي
ماتهوني ياحبة رمل هايمه ف بــــلادي
دا كان كلام جدِّتي بتحكي عن خـالي
الزاي يهون الوطن وحياتي تهــــنـالي
......
( شِدْوان) صمودك نغم ياعِزَّه لبــلادى
يحكى التاريخ ملحمه يحفظها أحفادي
رفع الجنود العلم فوق غرة السّــــاري
الله اكبر أمل ... ويقين يابــــــــــلادي
موسى كليم الله ف الوادى بينــــادى
.....
طاهره يا أرض النيل وسينا عنـــــواني
دا كان كـلام جِدِّتي بتحكي عن حالي
وصباح الخير يا( سينا ) يانبض ألحاني
…………..........
الجندى قايم خدمته هايم معاه ضي القــــــمر
حـاضن سلاحه بسمته مآمن بربه وبالـقـــــدر
يقول يا(سينا) باعشقك والعشق ليكى م القدر
أنا طير بيسبح فى هواكِ م الصـــــــغر
يكبر جناحى يضمنى ورق الشـجــــــر
(سينا) يادرعى ف محنتي وقت الخطر
( سينا ) يا لحني وغنوتى يوم الـسفر
أضحك ألاقى فى ضحكتى حبــك مطر
........
امسحى دموعك يا(سينا ) ودُ وسي فوق جرحك وعدّي
قلبي ليكى شراع ومركب ليكي عمري وكــــــــل كدّي
امـــــــــسحـــــــــــــى دموعـــــــــــك بِـــــــــــــــيَدِّي
..........
ارمـــــــــى هَمّك فوق كِتافى .. واسمعى منى هِتافي
انسى كل اللى باعوكى واوعى ع الأحلام تخافــــــــي
شايفه نيلك لون خدود ك والعبير اللى ف عيـــــــــونــك
و( الهرم ) و( السّد) وإحنا والصمود اللى ف جـــــــفونك
امسحى دموعك يا (سينا) بُكره جاي بالخــــــــير يِنَدِّي
امـسحى دموعك بيدّي .. وازرعي جــــــــــواكي ودّي
وافرشى قلبي شِراع فوق جبال الخــوف وعــــــــــدّي
اعمـلي قلبي براح وافردي جسمك ومِــــــــــــــــــدّي
اغزلي عمري نهار وازرعي حلـمك بيــــــــــــــــــــــدِّي
وانسى كل اللى باعوكي ولعزمتك ياللا شِــــــــــــدّي
............
ياللا بينا نقول يابكره يجي بكره بألـف فــــــــــكره
ياللا بينا نقول ح ننسى كل دمعه ف قلب ذكـرى
امسحى دموعك ياسينا اللى راح حَ نعيشه بكره
ازرعي جرحك جناين ولماضيكى كونى فاكــــــره
.........
امسحى دموعك ياغاليه بكره جــاى بالخير يمنّي
بكره جـاي وبألف فرحه جاى معاه الــــــطير يغني
لو يروح مليون شهيد امسحي دموعك وغــــــنّي
....................................
شعر / أيمن صبري ذنون ( أبوعماد ) .. صنصفط .. منوف .. مصر .
