كلاب السكك
للشاعر : محمد ضباشه
عضونى كلاب السكك
وكنت ماشى فى حالى
عمال بدندن لسوما
وماشى وما واخد بالى
أحوال بلدنا كدا
فيها ميت خبر جالى
خلونى ماشى تايه
ولا دارى بأحوالى
فخلوا بالكوا منهم
وبلاش تكونوا أمثالى
عايشين بقلوب طيبة
نصيبها العض طوالى
ممكن تشوفوا كلاب
من غير ديول وأنياب
شكلها شبه مننا
وضمن الأهل والأصحاب
من ضهرك ينهشوا لحمك
وفى وشك معاك أحباب
ويقعدوا يذموا فيك
وأه كله فى أمك عاب
فبلاش تأمن قوى
وخلى نصيحتى كتاب
كلاب فى صورة بشر
والفرق ما بينا ضمير
فيهم مبصر مابيشوفشى
وشايف لكنة ضرير
وفيه اللى يعاملك لعلة
ومعاك وجودة يهد الحيل
وفيه اللى تقول صاحبى
ويطلع فى المودة بخيل
وفيه اللى يكون منك
ونصيحته ليك تضلضل
ماهى حياتنا كدا
مقسومة
بين النهار والليل
وزى مافيه مننا
طيب بردوا فيه شرير