""كلمة وطن""

كلمات / محمود وحيد
كلمات استوحيتها من كلمات الشاعر يسرى الفار
===============================
يعنى ايه كلمة وطن
يعنى بيت فاتح بيبانه
للى بيحبه وصانــــــه
للى واهب ليه حياته
واللى بيخضر غيطانه
يعنى بدر نوره طارح
شمس بتدفى المطارح
نسمة فيها الطيب بيشفى
حب جوة الدم ســــــارح
يعنى بسمة فوق شفايف
شمعة للى ما عادش شايف
طير وشايل غصن رحمة
للى من أيامه خايـــــــــف
يعنى جندى واقف وحارس
للمصانع والمـــــــــــــدارس
فوق كفوفه الروح شايلها
أرضه أمه وليها فارس
يعنى إيد مع إيد بتبنــــى
يد إبنك ويا إبنـــــــــــــى
سيفنا ع اللى يخون ترابها
واللى فى المحنة يسيبنى
يعنى نيل دم ف وريدنا
بيه نقرب لو بعدنــــــــا
راية فوق الكون ترفرف
حبل يوصلنا بجدودنــا
يعنى مهما قولنا ياما
بردو من حقه الملامة
مش هنوفى وطنا حقه
من هنا ليوم القيامـــــة