إجعلنا ممن يعتبِر .
ـــــــــــــــــــــ
لمّا النبي خير الأنام
عليه من ربي الصلاة والسلام
وصانا في أزكى الكلام
قال انه في آخر الزمان
اللي على دينه يحافظ
زي اللي أيده قابضة على حصوة جمر
لمّا النفاق يملا البشر
وامّا الحقايق تندثر
تبقى السماحة إبتسامة في العيون
لو غمّضت 
تلقاها خنجر أو رصاصة في الظهر
وبقينا في زمن العِبَر
يارب عبدك مش نبي
يا رب انا مخلوق بشر
من كتر ما شايف نفاق
مبقيتش قادر أحتمل !
الفسق غلّف كل شيء
والبعض ع الباطل مُصّر
بيفسروا آيات كِتابك ع الهوى
أعطوا المكابره والعناد
لقب الجهاد !
وكفّروا كل اللي حاد
خلّوني انا مبقيتش عارف
يعني إيه معنى الجهاد
هو الجهاد إنك تخرّب في البلاد ؟
ولّا تملا بالأذى طرق العباد ؟
ولّا تِبِدل نورها ضلمة ،
عشان فسادك ينتصر !!
لو كان كده 
طيب وصدّ المُعتَدي تسموها أيه ؟
هل تبقى درب من الفساد !!
والا يشوفولها إسم تاني 
من عند شيخ الإجتهاد !!
إدوا كمان لقب الشهيد
لأي واحد ينتحر !!
هي الشَهادة بقت شِهادة ؟ 
يمنحها واحد م البَشَر !
حتى الولاد 
بيسمموا عقول الولاد
مبقوش يا عيني يعرفوا 
كلمة وطن معناها إيه
أو تعمل ايه
لمّا الوطن يبقى ف خطر
أو شُفت رايته هتنكسر
أو يعني إيه شرف البلاد !
كل المهم ازاي تدوس فوق الزناد
لو حد عارضك في الفكر !!
إوعاك تفكر في وطن أو في بلاد
كل المهم إن فكرك ينتشر !!!
يارب لطفك بالبشر
يارب نوّر بالهدايةِ دربنا
واكتب لنا 
ألأمن في أوطاننا
واهزم بطَولِكَ كل من خان أو غَدَر
واحفظ بحولِكَ من أنابوا واهتدوا
وخُذ عصاةَ القومِ أخذَ المقتَدِر
واحفظ علينا أمننا ياربنا
واجعل جهنم للعصاةِ المستقر
بكَ نستغيثُ ونستجيرُ إلاهنا
من كلِ فسقٍ شاع في زمن العِبَر
واكتب لنا أجرَ الشهادةِ ربنا
واجعلنا ممن يعتبِر
والطف بنا فيما قضيتَ
من قضاءٍ وقدر ..
ـــــــــــــــــــــــــــــــــ
علي فرج ( خواطر أدبية )
الأربعاء 1 يوليو 2015م
14 من رمضان 1436هـ