** سيدنا الحسين **
الرواي ماسك ربابة و الكرام قاعدين
صلّوا علي المصطفى و شفيعنا يوم الدين
يالّي نويت الزيارة لاَل بيت طاهرين
مصر الكريمة ترحب باللي جم زايرين
زينب و عيشة و نفيسة و الحسن لانور
شافعي و ليثي كمان و المسك و العنبر
عند الحسين الذكي البدر بينور
تفرح قلوب البشر و السعد يملا العين
أجمل مكان في البلد في القاهرة تلقاه
مسجد زمان اتبنى يا روعته يا بهاه
لما سألنا السبب في الأصل ليه بنيناه
جات الإجابة غرابة تدهش السامعين
قالوا الحسين اتقتل بالغدر في كربلاء
قتلوه و خدوا جثته دفنوها وسط خلاء
فصلوا دماغه الكريمة الغالية الغراء
حملوها للقاهرة يا حفيد نبينا الزين
عملوا المقام يا جدع و النور ملا الأرجاء
و بيوت كتيرة اتبنت من كافة الأنحاء
صبح المكان جوهرة بركة و جمال و صفاء
من كل قُطر و بلد زايرينه بالملايين
لما يهل هلال شهر الصيام رمضان
تلقي الحسين اتملا بالنور في كل مكان
قاعدات جميلة و لها ذكري في كل زمان
و علي الفيشاوي قهاوي صيتها جاب الصين
المالكي رز بلبن و الحلو بسبوسة
في ولي عهد البلد الفتّة مخصوصة
و الأنتيكات يا ولد عالرف مرصوصة
ميت الف سائح عشانها مالبلاد جاين
فرحات ده ملك الحمام و الطعم زيه مافيش
تاكل تقولي كمان بس اوعي ماتسميش
و القربه ميّة ورد و ان عُزت ماتخبيش
روح الغورية و قول خان الخليلي منين
يا حفيد شفيع البشر يالّي زيارتك نور
و من المقام انتشر مسك و عبير و بخور
يوم مولدك نقصدك نلقى المكان معمور
الجودة و يّا الكرم و العطف عالمساكين
** همسات رمضانية .. محمود بيومي **