-((((مين فى ولادك الأشطر)))))
ـــــــــــــــــــــــــــــــــ
مين فى ولادك الأشطر
اللى على المأذنه كبر
ولا اللى من همه بقى يسكر
لأن مزاجه متعكر
ومن تراب ايامه متعفر
ولو فاق يلاقى نفسه متكدر
ولا اللى حلم بعذابك 
وعايز حلمه يتفسر 
حلم بان النار وكلاكى
وكل ما فيكى يتكسر 
ونسى فى حلمه يطفيكى
دكان فى منامه بيشخر
ولا اللى عامل نفسه بيصلى
السبحةبيده متر او اكتر
وعامل فرده ع النسوان
الممسوسه والملبوسه
والمحبوسه ونفسها تكبر
ودخانه سد الشارع الاخضر
ووصفته ديك متيتم يكون أعور
الملبوسه يرقيها بكلمة 
حى احضر يا شيخ محضر
لاعمره عرف طريق جامع 
وعامل فيها شيخ منصر
--
مين فى ولادك الاشطر
اللى لمال اليتيم واكل 
خلص منه قبل ما يكبر
واللى بكدبه قال بيضه
خلى الكل يتحسر 
واللى فى كرشه بطيخة
والطبيخ عنده متلون
اشى اصفرواشى محمر
وجاره جنب منه جعان
وعصافير بطنه بتصفر
عرفتى مين فيهم الاشطر
واللى ساب ارضه ياكلها الدود
ولا عمره ف يوم شمر
عشان بذره يرويها تقوم تكبر
وتطرح غله ناكلها
بدال ما الارض تتدمر
واللى رمى عياله للشارع
وعلى مراته يتمنظر
شردهم وخلاهم لمد الايد مش اكتر 
واللى واقف على ناصيه يتلبن
والعفن طالع من بقه متخمر
وكلامه زى السم يخلى البنت تتزرزر
واللى لابس ومتشيك
وكلامه متنقى ومتفسر
نصاب وعاوز شنطته تكبر
بس انا عارف بقى الاشطر 
اللى فداكى فى يوم اغبر
واللى يتمنى يشيل همك
واللى حنانه بيضمك 
واللى عارف انه من غيرك 
ذراعه يكون ابتر
تعيشى يا بلدى
الزلبــ(محمودعمار)ــــانى