قول يا رب
هَمْ الغلابة لما تقل زرعوا الفرح فدادين
و سقوها دم و عرق و لخيرها منتظرين
و حلموا تطرح لهم مانجو و عنب مع تين
لكن أملهم خاب و تيجي السعادة منين
طول عمرهم بؤساء و في الهموم عايشين
حصدوا المرار و الألم و الدمع مَلو العين
عاشوا هوان و عذاب و لوقتنا صابرين
بيعانوا فقر و مرض و الحالة زي الطين
أقوى ما فيهم عليل و مين يداوي مين
طمعان يلاقي العلاج و يروح لمين و لفين
في الهم طول عمرهم في الغم بردو سنين
بيناموا على الأرصفة والوضع قاسي مَهين
البؤس بات عندهم و الحزن فيه قاعدين
من دار لدار بيشحتوا لقمة لطفل حزين
و لا حد يمسح دمعهم و لا حتى قلب حنون
للموت ببطء و ألم و في صمت هُم ماشيين
صبروا على بؤسهم طامعين في حُور العين
مالهمش غير ربنا كريم و قوي و متين
قادر يزيل كربهم قولوا يا خلق آمييييين
من كلمات و إلقاء الشاعر المصري
محمد العراقي في 25 / 6 / 2015م