يا رب عنا و قدرنا 
على الطاعة وصيام رمضان
==============
مسحراتى
داير ليلاتى
ادقدق بطبلى 
والمشى طابلى 
اصدح بشعرى 
وادندن و اعنى 
يا مصر يا امى 
هاسحر و لادك 
واجوب شوارعك
وادخل حاراتك
اصحى ناسك
يغتنموا من رمضان
اصحى يانايم
وقول نويت ان حييت 
باقى الشهر صايم
وليله كمان قايم
مستنى ليلة قدر
تقربنى للرحمن
*
رابع عقودى دبل ورودى 
وربيع العمر بسابقنى
وسادس ايام رمضان 
بيستعجلنى وبيجرى
يا شهرى غالى 
وعلينا عزيز هجرى
مهلك شويه عليه 
دا اللى راح منى
مباش فى الدنيا يا رمضان 
قده باقى و فاضلى
باللوم النفس 
وقربى لربى مطمنى
بادعى بغفران 
عسايا ربى يرحمنى
يغفر ذنوبى وبرحابه 
من الصيمين يقبلنى
وبصحبة نبينا الزين 
على حوضه يجمعنى
ومن حورك العين 
بعدد سنين العمر توهبلى
راضى بقضائك يا ربى
وصابر على اللى ظالمنى
وباسعى اوفى الدين 
عشمان انا بجنتك 
برضاك ورضا امى
ياللى عالم بحالى وسؤالى 
واختلاجات وخفا صدرى
عوضنى بجنة الخلد يا رحمن 
عن دنيا غروره ما تلزمنى
فانية وطاعتى فيها ليك 
يا ربى هى اللى فضلالى
اقبل دعايا ورجايا اليك 
وبالصبر يا ربى زودنى
علمنى حب الخير 
لاجل اعلمه لابنى
وابنى واعلى 
وارفع للعلا راية بلدى
واروى من حبى عطش نيلى
واقيد للفكر والواعين قناديلى
اتبتل وارتل بليلى بالقران
واغتنم بالزاد من رمضان
اصحى يا نايم 
وحد الديان
السعى للصوم 
خير من النوم
دى ليالى سمحه 
بعديها فرحه
فى جنة الخلد 
باب اختص للصيمين
يا بخت اللى ناله 
وفاز بدخوله من الريان
*
اصحى يانايم
وقول نويت الشهر صايم
وليله قايم
مستنى ليلة قدر
تقربنى للرحمن
يرفع منى القدر
ويكتبنى من صوام رمضان
يوهبنى بالجنه قصر
وافوز بدخولى من الريان
اصحى يانايم
وقول نويت ان حييت
باقى الشهر صايم
وليله كمان قايم
عشمان انا بغفران 
يا رب عنا و قدرنا 
على الطاعة 
وصيام رمضان
بقلم الشاعر راسم محمد