صيام ...فى عام
...........
رمضان فى كل الدنيا شهر 
واحنا نصومه بألف دهر 
ما يتنسيش
صيامنا عام ...عن الكلام 
ولو نطقنا ...
نفطر بقهر
رمضان فى بيتنا سحور مفيش
لا حلمنا بزبيب ولا بياميش
الحلم كله والإبيتهال
نصوم ونفطر كلام ..حلال
ويبقى صوتنا قبل الأدان 
مدفع ودانة 
ملو الودان
يمكن صراخنا مع السجود
ودمع عيننا يسقى الورود
يقبل دعانا فى ليل قيام
الحلة كانت ..مية ونابت 
ومبسوطين
لا قلنا لحمة ولا قلنا تين
ومشنة خالية من سب دين
لو فيها لقمة ..
بس بسماحة 
والفرن يحمى بلاط وطين
نحمى جروحنا اللى مفتوحين
ونشيل عجيننا 
نزور سجيننا 
زكاتنا كلمة
لملم يا شيخنا 
جمع زكاتنا م الزنازين 
ولو توزع ..
وزع فتاوى 
أحكام نقاوة 
بس بهداوة
واكتب تاريخها 
فوق الجبين
إعدام بجملة
والفجر ضلمة 
ما السبحة فرطت
على أرض طين
الشمس غربت 
سنتنا خلصت 
ويعود علينا بألف حزن
آخر سحورنا 
نودى غيرنا 
مطرح ما كنا 
ومدفونين
هات العيدية 
بعد الصيام
إطلق سراحنا 
فك اللجام 
عن حلق موتنا 
يا تروح تفوتنا 
نفك صوتنا 
نطلق شموسنا من الغيام
..............
بــقـــلــــم ا لـــشـــــا عــــــــر 
أ بــــو عـــمـــــــا ر ا لـــمـــصــــــــر ى