مدد يا شيخة سكسكة
للشاعر : محمد ضباشه

مدد يا شيخة سكسكة
فكى العمل من غير أيدين
وليكى ياختى الحلاوة
حاجة حلوة من العنين
البنت كارهة ياختى جوزها
وبايته برا من يومبن
وحتى مش طايقة عيالها
ولا طايقة حد فى الدارين
تملى سرحانه يا كبدى
وجوزها جالى يشتكى
وياما قالى من الكلام
مكسوفة أنه يتحكى
معرفش أيه بس اللى صابها
وجبناها عندك تترقى
هاتوا الصبية والبخور
والجاوى وياه مستكة
نشوفوا أية أصل الحكاية
وشغل خالتك سكسكة
وطفوا نور المندرة
وهووووس لكل الحضور
تعالى ياشبة أجلسى
وياسمعين هات البخور
أرمى بياضك على الحصيرة
وتبقى ورقة من الكبيرة
يا عفركووش أحضر تعالى
بين أيادى سكسكة
برتوش براتش برتكوش
باين الحكاية متلعبكة
كوكا دكوكا فى الهمك
مش سامعة فين العمل .. أه
مربوط على قرموط سمك
محتاجة منك فرختين
وديك كبير شبة الطاووس
وهاتى طرحة ومندلين
وشعرتين من على الرؤوس
يا بن هلايا أنصرف
وابعتلى بكرا هلبتوش
قامت الصبية من قصادها
وتقول حماتها يارب حوش
وجرى راحت على الفرارجى
تجهز لها المطلوب
الفرختين وديك كبير
مايكنش فيه أى عيوب
وروحت حماتها مولعة
وتقول يارب الصح فين
وماشية الصبية والحقيقة
بايتة فيها من يومين
القلب باين أنشغل
وعنيها فيها متورطين
وأبن الجيران كان مختفى
وجة مكانة العمل
وباعت جوزها بكلمتين
لحب تانى ما أكتمل
وتوهتنا فى الحقيقة
وفى البخور والمستكة
وفى هلايا وعفركوش
ونصب خالتك سكسكة