..............** كنّا ...و أصبحنا **................
----------------------------------------------------
كنّا :
لمّا صديق يبنى بيت ... كلّنا نساعده
واحد يناول فى طوب...و صُحبه يخطّطوا أرضه
و أسره تعمل غدا ... وجار بيعمل شاى
و جار يوزّع سجاير عالبنّا وللى جاىّ
وواحد بيملا القلل... بمايّه تتبرّد
وتانى يحدى بأغانى... تقوّى وتأيّد
كان كرنفال للتعاون... والحب والإخلاص
عشان صديقهم بيبنى.. بيته وسط الناس
..............................................................
أصبحنا :
اللى بيبنى له بيت .. لا نساعده ولا نسكت
لسانّا ينقد يجرّح...وناس فى الحىّ بتبكّت
وللى مسلّط لسانه وقلمه للتشكيك
لا عاجبه اللى بيبنى.. ولا اللى قال لبّيك
لو طال يهدّ البنا... و يقطّع الخارطه
ويبوّظ المونه يبقى البانى فى ورطه
ويشعل النار. و يحرق فى بنا جاره
مش عاوزه يوم ينستر.. و يعلا مقداره
أهو دا اللى حاصل هنا .. من شرار القوم
وحسبنا الله..و نعم الحى والقيّوم .
....................................................( رفعت فايد )