حوار يتيم----------
ــــــــــــــــــــــــــــــــــــــمحمودعمارالزلبانى
ــــــــــــــــــــــــــــ
خلاص ياأمى كشفتك
ولقيت اجابة سؤالى
دلوقتى بس عرفتك
ليه بتطمنى حالى
طب فين ياأمى أبويا
لساه برضه مسافر
ولا يمكن عند أخويا
ولا بره مهاجر
خلاص عرفت الحقيقه
أتارينى ياأمى يتيم
كان نفسى أشوفه دقيقه
يا أمى فراقه أليم
أصحابى فرحانه عيونهم
وأنا من بدرى بقاسى
الضحكه زايره جفونهم
والحزن طالع مقاسى
كان نفسى ألمس إيديه
ويمسح لى بيهم دموعى
يندهلى أجرى عليه
أفرح وأفرد قلوعى
وأحكي له سرى يا أمى
وأقوله ع اللى تاعبنى
وأرمى على كتفه همى
وأسمع كلمة يا إبنى
سنين تقولى مسافر
وأملى كان مرة أشوفه
طب يجى حتى زاير
تقولى للغايب ظروفه
تورينى صوره وحاجاته
لساكى محافظه عليها
وتحكى لى بعض حكاياته
ودموعك عنى تداريها
كنت ألمح حزن ف عنيكى
وتقولى بكره هايرجع
والحزن شارينى وشاريكى
دا مر فراقه بيوجع
فى حضنك كنت بنام
ودمعك على خدى يكوى
أصحى أقولك حرام
دا حزنك لقلبى بيشوى
وياكى ما حسيت بيتمى
دقلبك لقلبى حبيب
يا بلسم شافى لجسمى
خلاص يا غاليه دا حكمه
ربك يزيح الهموم
راضى يا أمى لحكمه
ويا ريت رضاكى يدوم
يارب إرحم حبيبى
وخلى الجنه مكانه
كان نفسى يبقى طبيبى
يارب طيب لسانه
*******************محمودعمار الزلبانى