............** أقلام ألوان **............
-----------------------------------------------------
أقلام بتكتب عالورق بالوان كتير
أقلام بتكتب شىء جميل
واقلام بتكتب شىء خطير
أحمر شجاع خطّه قوى.. كلّه حماس
الكلمه منّه قذائف من بارود ورصاص
خايف على بلده .. يدافع عنّها بخطّه
ما يخافش لا من جماعه ولا من عدو لبلده
والتانى أصفر يحذّر .. من عدو جبان
كل كتابته نصايح.. توقظ النعسان
والأخضرانى سلام.. ومحبّه عاوز الخير
كل كتابته أمل.. تسعد بيه الجماهير
وقلم رمادى.. مالهش رأى ولا يهتم
أيوه بيكتب صحيح.. لكن كتابه ما تهمّ
خوّاف ما لهش مواقف.. نحو جيش بلده
لا هو مؤيّد ولا معارض...ولا ضدّه
وقلم بيكتب بخط ابيض ما تقراهوش
لأنّه فوق الورق. باهت وماتشوفهوش
وقلم بلون قوس قزح.. على كل لون شغال
تقرا كلامه تتوه.. مهو كل ساعه ف حال
وقلم سواده بينضح عالورق ضلمه
غل وحقد وحسد.. تابع لهوى شلّه
وقلم بخط سماوى .. صافى كماء البحر
تقرا كلامه يفرحك... زى النسيم فى الحر
أقلام على كل لون... بتطيع أوامر الإيد
فيها اللى زعلان .. وفيها اللى بصاحبه سعيد
 بقلم ... رفعت فايد