هوه يغنى صحيح.. والناس تقول : دا سعيد
وهوه بس ياعينى .. ربّه اللى عالم بيه
لا بيشتكى وحدته.. ولا بيحكى لحد
مهو كل واحد أكيد.. فيه اللى ما يكفيه
الناس قلوبها مخازن.. صناديق مقفوله
الشكوى للى خلق.. وحده وغيره ما فيه
ياما ناس بتضحك.. وجوّه العين دموع واقفه
لو حيسيبوها حتملا وادى وتغطّيه
وناس بتبدوا سعيده... قدّام المخاليق
ولمّا تبقى وحيده... ليلها ما تنام فيه
وناس تضحّك ف ناس.. وتخفّ عنها الحمل
وهىّ مع حملها... مش قادره تمشى بيه
وناس بترضى بقليله.. وقلوبها مليانه حب
عمر الحسد ما يزورها... ولا تفكّر فيه
وناس تحب بلدها... وعاشقه لترابها
وطنها دا شىء مقدّس.. أبدا ما تغلط فيه
الناس دى رغم اللى فيها.. محسوده م الجهلاء
اللى يشوفوا اللى ظاهر .. والحكم يبقى عليه
والحمد لله رضينا بما قسم ربّى
يكفينا شرّ المرض... والباقى راضيين بيه .
..................................( رفعت فايد ).