مين ح يبلَّغ مصر سلامي

..........................................

فيكى يابلدي عايش أحزانى
كله بيخنق نور أيامى
كله بيوعد وبيخلابي
لاعارف فيكى بريء من جاني
ولاحالي بيتبدِّل أبدا
ولاهمِّي بيروح عن بالي
ثُرت وقلت خلاص راح أفرح
قلت ح اودَّع كل آلامي
راح الحلم معاه الضحكه
واللي ظالَمني راجع تاني
نفس الوش ونفس السحنه
ساقيه وداير فيها زماني
قولِّي ياشيخنا وقول ياسياسي
ثوره وثوره وفين أحلامي
واللي قاتلني عاش متهنِّي
وراجع يخنق صوت أحفادي
نفس الجرح ونفس التوهه
ونفس الدمعه باعيش أيامي
فيكي يابلدي عايش ترحالي
شطى بيبعد .مُوجي رماني
صحَّى اليأس ف جدار قلبي
ليه الحق حبيس ألواني
قلت ح اسافر يوم واتغرَّب
لمَّا بلادي عصت أحلامي
وعشت الغربه ومر الغربه
وشعور يقتل كل آمالي
وقلبي بيصرخ عشق لبلدي
رغم البعد ورغم عتابي
وراجع قلبي ويسبق حلمي
عشق لوطني وعشق أحبابي
فردت قلوعي وقلت أعدِّي
واطوي الغربه حنين لبلادى
وقلبي يرفرف وبيسبقنى
لاجل مايحضن ضِل ولادى
لكن ضجَّه تِعلىَ وتِعلىَ
قالوا المركب مش شيلاني
تبكي عيوني حنين وتقولِّي
مين ح يبلَّغ مصر سلامي
أغرق واغرق لكن حاسس
إنِّى غرقت ف عشق بلادي
لكن أسأل عايش بعدي
م اللي قاتلني وباع أحلامي
ليه العاشق ليها بيشقىَ
واللى قاتلنا راجع عاتي
أنا الغلبان ف بلادى كإنِّي
عايش عمري أستنىَ مماتي
......................................................

شعر / أيمن صبري زنون أبوعماد . صنصفط . منوف . مصر .