جــــــواز حــــــرام
..............
ولما يخنقك البراح
والضلمة تفرش سكتك
وتتوه خطاوى الشمس
فى الليل المسافر للرجوع
تتزرع ....أرض العيون البور
بفدادين الدموع
تطرح على رمشك تباريح الوجع
آاه يا جدع
كات بنت حلوة حنينة
عاشقة تفاصيل ضحكتك
كانت بتفرش باللقا سكة صباح
وخطاوى عايقة ملونة
كان العبير يسبق خطاويها لهناك
تستنى كل الأمنيات المـُمـكـِنـــة
لحظة لـُقـــا
عصافير وعاشقة الزقزقة
وانت اللى متعـَطـَّـر بشوقك
من سنين
شايل غناوى تلم كل العاشقين
وتفرق الأفراح دبل
تبعت مراسيل الهوى
لقلوب طيابة عشقانين
ييجى المعاد
تستنى
تشرب طعم لون بوسة اشتياق
شايل زكايب من حنين
تلمح بطرف عنيك هناك
ضل وخيال
تفـرُك عنيك م الإندهاش
وتقول ..محال
تكره عيونك يا جدع
تتمنـَّى لو كان الودع
كداب كبير
زحمة فى قلبك
كل شئ مرهون بشئ
حتى الخطاوى المقتولين
غاويين يتوهو فى الطريق
رمل الشطوط كانت بتستنى المعاد
ما تشيشلشى تقل الحزن
تتكـَلـفـِـت بطين
وحبيبتك المرهونة باللقمة الحلال
تاكل حرام وتأكلك مر الأنين
على إيه نويت ؟
هتسيها وتعاود ؟
ولا هتمـسـِك فى تلافيف الأمل
يمكن تلاقى الحل من غير الدبل
عروسة مخطوبة
لميت مليون عريس
وتزفـَّها الضلمة لحبل وقيد شاويش
وجواز حرام
باطـِل ومتغـَلـِّف بجلابيـِّة حلال
لا القاضى يكتب فى القسيمة إسمها
ولا فيه شهود
كل المعازيم طمعانين
يشربوا من دم عرسانها الهنا
واشمعنى .إنت بس ..رافض للفـَرَح
واشمعنى قلبك من كل القلوب
اللى انجـَرَح
الزفة طالعة م الميدان
نفس المكان
أيام ما كنت هناك
تقابل سحرها
وتوشوش الحظ اللى خانك
وتطاطى للعمر اللى هانك
مش إهانة يا جدع
دة جحر ديب مليان أفاعى
والكل منه بيتلدع
حتى المخاوى والرفاعى
واللى غاوى واللى ساعى
شايلين على قلوبهم
علامات الوجع
............
بــــقـــلــــــم ا لـــشـــــــا عــــــــــر
أ بـــــو عـــمــــــــا ر ا لـــمــــصـــــــــــر ى
