حالة بلد
*******
ايه جرالك يابلد
الظالم يلبس عمامه
ويقوم بالإمامه
والكل يتبعوه
ويقولوا صدقوه !!!!!!
فين راحت الشهامه ؟
لما الشيخ بيعذبوه
وولاده يجحدوه
والإبن يقتل أمه
والأخ يظلم أخوه
وزوج يتنكر لزوجته
والطفل إللي بينهم
في الشوارع يرموه
وغيره يدللوه
وبالسلسله يعرفوه
ومهماً غلط مايتحاسب
أصل أهله !!!!!!!بيحموه
وفي الميلاد يسجلوه ولد
هوا ايه بس
إللي جرالك يابلد
دا الحق فيكي ميت
والظلم هوا السيد
فيكي ناس الغل مالي قلوبهم
والطيبين فيهم الفقر واكِلهم
ويصرخوا ياخلق هوه
الرحمه
أنا نفسي أعيش
بس إزاي والعدل مافيش
والحظ بيدي ناس
والباقي مايبديش
والدنيا مش لينا
دايماً جايه علينا
دي اللقمه في الزباله
تدور ما تلاقيش !!!!!!!
وبعد كل دا
حالك هاينصلح يابلد
دا الحق فيكي ضايع
واللي مالوش ضهر
تلاقيه في الشوارع صايع
آااااه يابلد
لو كنتي في الحق دوغري !!!!!!
ماكنت فيكي اتهنت
ولا انظلمت من صغري
وما إتحكم فيا مريض
من بحري أو من قبلي
آااااه يابلد
لما الولدفيكي يلبس ست
ويسمي نفسه بنت
وليل ونهار سارح ع النت
وبيتفرج علي التت
والست إللي يموت راجلها
ماتلاقي إيد تتمدلها
ولا للهم تشيل عنها
وتبقي بولادها محتاسه
وفي رجلين الناس منداسه
آااااااه يابلد
قالت كدا بزياه
أنا إيه يجبرني أعيش عاله
أستني حد يشيلني
ومنها مليون حاله وحاله
قلعت ثياب الست
ولبست ثياب الولد
مش دا إللي بيجري فيكي يابلد
قالت يامعين
بيك وحدك باستعين
ان تكون لي السند
ياااااارب أنا عليك وحدك بعتمد
وهوا ايه الفرق
مابين البنت والولد
غير إيد بالشرف شعاله
زيها زي الرجاله
رافضه تعيش عواله
تتعب وتشقي في جلد
راضيه بقضاء الله
حمداه وشكراه علي إبتلاه
ولا يوم تشتكي الآه
وبالصبر والجلد
قررت
إن مصيرها تتحداه
وبدأت المعاناه
الست مش نص المجتمع
الست بالإراده والعزيمه
بالعالم كله لو إجتمع
دايماً قد المسئوليه
ما تولول
ولاتعمل من مأساته قضيه
وكبر الولد
إللي ربته علي عشق تراب البلد
وصانت عرض البنات
لا سرقت ولا خانت
ولا قالت للغدر هات
نسيت جمالها
ووهبته لعيالها
ولا يوم إتمردت
ولا قالت إزاي
هاأعيش في توب ولد
وأدي البت والولد
مين فيهم أنفع للبلد
ورغم كل دا
بردوا بحبك
بعشقك ياأعز وأغلي بقاع الأرض
بحبك يابلد
صفاء عبد ربه
