أنا قلبى منك إستجار
***********
هجر تانى ؟
بُعـــد تانى ؟
أنا قلبى منك إستجار
صبر تانى ؟
وسهد تانى ؟
وعمر ضاع ف الإنتظار
وحظى ليه وياك كده ؟
دا الليل بيطلع له نهار
ومافيش محبه
حَبه وحَبه
يومين ف جنه
ويومين ف نار
**********
لو طبع فيك القسوة دى
كنت أعذرك
واخنق هواك ف القلب
مهما يحن لك
طب قولى ليه أستحملك
خليك مكانى هاتعمل إيه
لو يوم حبيبك يهملك
والبعد نار
يسقيك مرار
أنا قلبى منك إستجار
***********
صّبرت قلبى
وقلت خايف م الهوى
أو حد قال له الرقه ضعف
والصبر جايز له دوا
كان أملى أشوف للضلمه نور
ما يكونش حب ف أرض بور
ولا ليل طويل ملهوش نهار
أنا قلبى منك إستجار
محمد عبد المنصف
