حرامية المولد
ــــــــــــــــــ
ساعة الولادة
الكل حواليها
كانوا منتظرين
بلهفة عمر بحاله
وفرحة وشوق وحنين
شباب وشيوخ
حارسنها
وبيمسحوا عنها الطين
وأمهات وبنات
مجهزين الموغات
والشمع والرياحين
وكانت المولودة
ماشالله
حلوة الحلوين
لكن ساعة الولادة
وفي زحمة السعادة
كان اللصوص جاهزين
من كل شكل ولون
وعلى كل مله ودين
خدعوا اهل المولودة
رقصوا وغنوا معهاهم
قال يعني فرحانين
سعدا ومزقططين
حضنوا المولودة
شالوها
قال يعني بيلاعبوها
وقاموا هربانيين
ومن ساعتها
الفرحة صبحت مناحة
على طول وعرض الساحة
وما شوفونا المولودة تاني
لحد هذا الحين
الخطة كانت محبوكة
والقصة كمان مسبوكة
وعليها سهرانيين
لكن في كل ميعاد
سنوي يمر علينا
فاكرين ومش ناسيين
إن المولودة دي كانت
قمر الليل الحزين
لأ ما كانتش
دي كاينة
ولا غابت ع البال ثانية
رغم الوجوه الخاينة
هتظل النسمة الحانية
وحلوة الحلوين
ــــــــــــ
عادل دعبس
