( مالك يا عم ؟ ) م /عبالحميد سالم
بالذمة دى مش حاجة تغم
أخبار مستفزة بتزيد الهم
ناس بتجوز أطفال ف مدارس
وبنات م الفقر صبحوا عوانس
وشباب متكحول ف الدنيا ولايص
مش لاقى شقة فيها يتلم
واللى يغيظ فى زمن التلاهى
عملوا فرح والشبكة تباهى
دا الفروض عملوه ف ملاهى
وان قلت كدا عيب ياولاد العم !
يقولك بفلوسنا مالك إنت يا عم ؟
******
نسيبهم وروح ف سكة تانية
ونشوف والنبى آخرة الأخبار
الست فيفى رجعت ترقص
مهى خبرة وتغزل برجل حمار
وايوه كده وخمسة مواااه .
مشتاقة للرقص يا ولداه
دا اللى ف سنها بتدق الزار
خلينا ف حالنا إحنا يا عم
دا محدش عاد بيخاف م النار
إلا القليل ف سبحانك اللهم
******
وف المهرجانات حدث ولا عيب
لبس النجوم بقى بالملايين
وفوق الركبة ييجى بشبرين
لحم رخيص وع المكشوف
والعرى أصبح شيئ مألوف
بناطيل مقطعة ورا وقدام
وان قلت العرى حرام يا مدام
تقولك عايزنا نرجع للخلف
روح جدد خطاب دينك أهم
دى حرية ومالك بينا يا عم ؟
