نبذة عن التويفل TOEFL 
Test of English as a Foreign Language
هو ببساطة اختبار مكون من مجموعة من الاجزاء تحصل فيه على سكور معين و هو ليس امتحان نجاح او سقوط انما السكور الذي تحصل عليه يؤهلك للمكان الذي تريد التعيين او الاشتغال به .
فهناك مكان يطلب 500 و مكان اخر يطلب 600 وهكذا ...
يوجد كذا طريقة للامتحان .
ولو دخلت على المواقع المختصة بالتويفل هتلاقى نظم مختلفة بس للا ختصار و عدم اللخبطة هانقول اللي يهمنا ان
طريقة الامتحان في معظم الاماكن في مصر تعتمد على الاختبار الورقي و احنا يهمنا Local Toefl

ماهية الامتحان

الامتحان مقسم الى ثلاث اجزاء: 
• جزء الاستماع listening -) وقته 35 دقيقة – مكون من 50 MCQ (.
• جزء القواعد structure - ) وقته 25 دقيقة – مكون من 40 سؤال )
( 15 سؤال MCQ + 25 سؤال جملة تصحيح ) .
• جزء القراءة reading - ( وقته 55 دقيقة – مكون من 5 قطع وكل قطعة عليها 10 اسئلة MCQ) .
مش عايز حد يتخض او يحس برهبة – الموضوع ان شاء الله سهل بس محتاج تركيز

الوقت : حوالي الساعتين (للامتحان كله ). 
احتياجات الامتحان : 
قلم رصاص ( هاتعرف ليه كمان شوية ) ---- مسطرة --- استيكة --- البطاقة الشخصية --- ساعة أو موبايل ( لمعرفة الوقت ) 

القلم الرصاص مش الجاف مهم جدا انه يكون رصاص لانك ممكن تغلط و تعلم على اجابة خطا في ورقة الاجابة وعايز تصححها يبقى لازم يكون رصاص علشان تمسح بالاستيكة وتعلم على الاجابة الصحيحة ( الصراحة كنت فاكر اول ما قالوا هاتوا قلم رصاص انهم قالوا لنا كده علشان يبقوا هم يكتبوا الاجابات الصح بالجاف في الكنترول ويدولنا درجات لاننا بنكتب السكور اللي احنا عايزينه و احنا بندفع فلوس الامتحان - بس طبعا كان ظن في غير محله!!) 

كيفية المذاكرة 

صراحة دي حاجة صعب تتشرح بس ممكن اكتب خطوط عامة و ياريت لو تقعد مع حد امتحن تويفل قبل كده ويكلمك كده ييجي نص ساعة علشان الموضوع يتظبط في دماغك. 
معظم الجامعات ( مثل القاهرة – عين شمس – بنها – الزقازيق ) بتستعمل كتب Longman 

اما الكتاب اللي بيبيعوه في اداب القاهرة اسمه
(Skills & Strategies)
Preparation course for the toefl test (PAPER TEST): Longman 
بس انا شايف ان مافيش فرق كبير بين الكتابين لان امتحان التويفل في الاول و الاخر له خريطة معينة و بيقيس مهارات محددة معروفة و جميع كتب التويفل بتدور حوالين انك ازاي تكتسب المهارات دي و تحل الامتحان صح .

 كتاب اللي بيبيعوه في اداب القاهرة – مركز اللغات و الترجمة بحوالي 70 جنيه ( على فكرة انا ما اشتريتهوش ).بس اللي مبيعرفش يقرا على الكمبيوتر وعينه بتوجعه: يا اما يشتري الكتاب او يستعيره من أحد الزملاء. 
. وكان مع الكتاب اسطوانة بتتباع مع الكتاب وهي عبارة عن برنامج يتسطب على جهاز الكمبيوتر وفيه بعض التدريبات و الامتحانات الكاملة لتدريبك على امتحان التويفل قبل دخوله ( على فكرة كل أسئلة الStructure جاءت بالنص من الاسطوانة ) الاسطوانة مش شرح- الاسطوانة عبارة عن أسئلة بس . لان المفروض الشرح في الكتاب .
إلى جانب الكتاب استعنت بملف باور بوينت مش فاكر نزلته منين بس فيه خلاصة الانجليزي كقواعد .. بس مفيد جدا جدا جدا.
Preparation course for the toefl test (PAPER TEST) : Longman 

نقاط مهمة جدا في الحل اثناء الامتحان:

انت تقوم باستلام ورقتين: الورقة الاولى وهي ورقة واحدة للاجابة 
اما الورقة الثانية فهي عبارة عن كذا ورقة و فيها الاسئلة ويتم تسليم الورقتين في نهاية الامتحان

? ضروري جدا انك تعلم على الاجابة الصحيحة ( الدائرة ) التي تعبر عن الاجابة الصحيحة عن طريق تسويدها بالكامل يعني تخلي الدائرة بعد ماكانت بيضاء و الحرف في نصفها باين تظللها بالكامل لحد ما تبقى سودة . 


? اغلق المحمول لو معاك ساعة - , و لو مفيش معاك ساعة افتح الموبايل عادي بس خليه صامت وتأكد انه مش هايصدر منه اي صوت مزعج اثناء الامتحان و خاصة في الجزء بتاع الاستماع لان الجملة بتتقال مرة واحدة بس ولا يتم تكرارها. 


? لا داعي للقلق فالاطباء هم اعلى الدرجات في امتحان التويفل و الكثير منهم اعتمد على الخبرات المتراكمة في حياته الطبية كتعامل مع اللغة الانجليزية لكن طبعا بتتم المراجعة و تظبيط بعض الحجات عن طريق مذاكرة – في ظني – تحتاج مجهود اقل مما يحتاجه الناس من الكليات الاخرى . 


زي ما قلت قبل كده ان امتحان التويفل يختبر مهارات معينة المفروض ان حضرتك تكتسبها علشان يبقى اسمك عارف لغة انجليزية , وبقدر المهارات المكتسبة يكون السكور بتاعك وهكذا .. وقلت ان جميع كتب التويفل بتدور حول ازاي انك تكتسب المهارات دي فمش فارق اي كتاب هتذاكر منه ( بس انا هنا ذكرت انا ذاكرت منين علشان محدش يدوخ ). 

واحد يسال ايه هي المهارات دي؟؟ 

ارد و اقول ان الامتحان Local Toefl فيه ثلاث اجزاء ( الاستماع – القواعد – القراءة ) ولكل جزء مهارات معروفة هتلاقيها كعناوين في الكتاب 

الاستماع Listening

) وقته 35 دقيقة – مكون من 50 MCQ (
وفيه يتم الاستماع و لمرة واحدة فقط لمحادثة تتنوع من القصيرة الى الطويلة ثم يكون سؤال واحد أو عدة اسئلة عن القطعة المستمع اليها
وعادة الجمل اللي في الاول بتكون اسهل ثم تتدرج الصعوبة وهكذا
جزء الاستماع ينقسم الى ثلاثة اقسام:
أول 30 محادثة بيكونوا محادثات قصيرة جدا بييجي على كل محادثة سؤال واحد MCQ
ثم القسم الثاني عبارة عن عدد 2 محادثة أطول قليلا وعلى كل محادثة 4 اسئلة MCQ
القسم الثالث عبارة عن عدد 3 قطع مقرؤة بيقولها شخص واحد وتسمعها انت و لا تكون محادثة بين شخصين و على كل واحدة 4 اسئلة MCQ
يبقى مجموع الاسئلة كده 50 MCQ

نصائح عامة لجزء الاستماع : 

1 - ركز .. ثم ركز لان الجمل لاتقال غير مرة واحدة ولن تتكرر

2 - لاتترك اجابة اي سؤال فارغة (خمن ان لم تعرف الاجابة بدقة )

3 - ان كان هناك وقت , انظر في اجابات الاسئلة في ورقة الاسئلة لتكوين فكرة عن الجملة التى سوف تسمعها كسؤال لهذه الاجابات.

4 - اذا لم تجد الاجابة الصحيحة التي تثق بها 100% الجا الى قانون الاستبعاد عن طريق استبعاد الاجابات الغير مناسبة.

5 - عادة الاجابة تكون في الجملة الثانية من الحوار( ده بالنسبة لل30 حوار الاولي ) 6 - بالنسبة للقسمين التانيين في الاستماع بيكون الكلام كتير و لازم لازم لازم تركز قوي في الجملة الاولى من القطعة لانها عادة فيها مفتاح الاجابات كلها , وكمان الاسئلة على كل واحدة بيكون بالترتيب يعني السؤال الاول هايكون عن بداية القطعة و السؤال الرابع هايكون عن نهاية القطعة . 

وفي اعتقادي ومن تجربتي و العديد من الزملاء ان جزء الاستماع هو اغلس جزء لان الجملة بتتقال مرة واحدة وبلكنة انجليزي انجليزي مش الانجليزي المكسر بتاعنا , وعادة هتلاقي الصعوبة لو اللي بينطق واحدة ست انما لو راجل اللي بيتكلم أعتقد انك هاتفهم منه احسن !! 


ولكن نصيحتي علشان تعدي الموضوع ده انك تسمع لك شوية من اسئلة الاستماع علشان تتعود على اللهجة ومرة في مرة هاتفهم اللي بيتقال 

ايه هي المهارات المطلوب تقييمها في الاستماع ؟؟ 

المهارات هي كالتالي ( على فكرة كل مهارة من دول مشروحة كويس و عليها امثلة في الكتاب ): 

بالنسبة لأول جمل حوارية (القسم الاول في الاستماع 30 جملة عليهم 30 سؤال) هايقيس فيها المهارات التالية عندك: 

Skill 2-Choose answers with synonyms
Skill 3-Avoid similar sounds
Skill 4-Draw conclusions about who, what where
Skill 5-Listen for who and what in passives
Skill 6-Listen for who and what With multiple nouns
Skill 7-Listen for negative expressions
Skill 8-Listen for double negative expressions
Skill 9-Listen for "almost negative" expressions
Skill 10-Listen for negatives with comparatives
Skill 11-Listen for expressions of agreement
Skill 12-Listen for expressions of uncertainty and suggestion
Skill 13-Listen for emphatic expressions of surprise
Skill 14-Listen for wishes
Skill 15-Listen for untrue conditions
Skill 16-Listen for two- and three-part verbs
Skill 17-Listen for idioms
Skill 1-Focus on the last line 

طبعا لكل مهارة شرح في الكتاب لكن هاحاول باذن الله اوجز كل مهارة معناها ايه و تتحل ازاي.. 

يعني تركز على الجملة الثاني اللي بتتقال لان عادة الاجابة بتكون فى الجملة الثانية – بتسمع واحد بيتكلم وواحدة بترد عليه ييجي المعلق ويقول الست كانت عايزة ايه ؟؟ ماشي!! Skill 1-Focus on the last line

يعني خللي بالك من الكلمات المترادفة ( على سبيل المثال في الجملة يقول ان فلان Work في الحتة الفلانية وفي الاجابات متلاقيش كلمة work لكنك تلاقي الاحابة بتقول ان وظيفته كذا ويجيب كلمة job يبقى هنا الكلمتين دول مترادفين Skill 2-Choose answers with synonyms

يعني خللي بالك من الكلمات التي لها نطق صوتي متقارب جدا و لكنها طبعا مختلفة في المعنى جدا – يعني ممكن فى جملة السؤال يتقال ان فلان بيعمل research وييجي في وسط الاختيارات انه راح church او انه searching عن حاجة معينة – لازم تكون مركز علشان ميضحكش عليك في حتة زي دي . Skill 3-Avoid similar sounds


اظن مفهومة – وانت بتسمع جمل السؤال لازم في دماغك تستنتج مين بيكلم مين و فين و امتى وده شيء بيتم استنتاجه ببساطة – يعني واحد بيقول لواحد انته معملتش واجبك امبارح فرد عليه التاني قال له ما نت اللي مدينا واجب كتير ( ييجى في الاختيارات يسال الحوار ده حصل فين ). Skill 4-Draw conclusions about who, what where

Skill 6-Listen for who and what With multiple nouns Skill 5-Listen for who and what in passives

يعني نفس النقطة اللي فاتت بس خللي بالك( مين اللي عمل ايه ) لان الجمل بتبقى مبني للمجهول أو فيها كذا فاعل ( على فكرة مشروحين في الكتاب كويس ) 

Skill 8-Listen for double negative expressions Skill 7-Listen for negative expressions
القاعدتين او المهارتين دول مهمين جدا ومعناهم خلي بالك من الجمل المنفية يعني لما اقول ان حنا لم نسافر ببطء معناها اننا سافرنا بسرعة ده غرض المهارة الاولانية - المهارة الثانية معناها من الاخر نفي النفي اثبات ( انظر الكتاب )

فيه كلمات لو اتحطت في الجملة تدي معني النفي زي كلمة نادرا ما يفعل الشيء Skill 9-Listen for "almost negative" expressions

يعني عند مقارنة كذا شخص اخللي بالي – مثال (لا احد اذكى من فلان في المكان – معناها ان فلان هو الاذكى ) Skill 10-Listen for negatives with comparatives

) فيه تعبيرات تدل على توافق الطرفين في الرأي زي Skill 11-Listen for expressions of agreement
(me too – so do I – I’ll say – you can say that again –isn’t it )
على فكرة isn’t it لو جت كجملة خبرية كده لوحدها يبقى معناها انا موافق
انما لو جت في نهاية جملة بصيغة استفهامية يبقى معناها ان الشخص مش متاكد من اللي بيقوله ودي المهارة التالية

فيه تعبيرات اول ما تسمعها تقول ان الشخص مش متأكد زي Skill 12-Listen for expressions of uncertainty and suggestion

أو انه بيقترح شيء زي why not … ? – Let’s …. 
isn’t it – as far as I know- as far as I can tell 

Skill 13-Listen for emphatic expressions of surprise 
تعبيرات الدهشة و التعجب و عدم التصديق ( يعني مثلا واحد بيقول ان فلان نجح في الامتحان فالتاني يرد ويقول يارااااجل؟ ده كان بيذاكر بقى!! معناها ان التاني كان بيعتقد ان فلان ده فااااشل )وعادة هتلاقى الجملة الثانية في الحوار تبدأ بكلمة then,….. والكلمة دي زي ياراااجل عندنا تعبر عن عدم تصديقه وتلاقيه في الجملة كده تحس انه بيجز على اسنانه .

الكلمات و التعبيرات التي تدل على التمني معناها ان هذا الشيء غير موجود حاليا في الواقع الان Skill 14-Listen for wishes

المهارة دي بقى مخصوص علشان كلمة IF يعني ( لو ) وهي نفس معنى المهارة السابقة وعلى فكرة اول ماتلاقى كلمة if يبقى معناها انه مينفعش. Skill 15-Listen for untrue conditions

فيه كلمات و افعال يدخل فيها كذا جزء ( مثال ييجي في الجملة ويقول ان فلان عملCall off للمقابلة وييجي في الاجابة متلاقيش في الاختيارات كلمة call off و تلاقي كلمة cancelled ليه لان معنى call off = cancel وهكذا... Skill 16-Listen for two- and three-part verbs


يعني الامثال و الحكم ( مثلا لما يقول it is piece of cake يبقى معناها ان الامور كانت سهلة \ Skill 17-Listen for idioms 


Burning the candle on both ends معناها انه بيشتغل جامد جدا و مقطع نفسه شغل \ Putting the cart before the horse معناها انه بيعمل حاجة ده مش اوانها.... وهكذا) 

هم دول المهارات ال17 اللي هايدور حواليهم بيدور امتحان الاستماع ( القسم الاول ) و مشروحين كويس جدا في الكتاب و عليهم امثلة و فيه في اخر الكتاب بعض الامثلة للامثال و الحكم , و ان شاء الله بعدها مش هايبقى الامر صعب و لا حاجة بعون الله و توفيقه . 


بالنسبة للقسمين التاليين في الاستماع هايقيس عندك المهارات التالية: 


Skill 19 – Anticipate the questions. Skill 18- Anticipate the topic.
المهارتين دول معناهم توقع أو تنبأ من الحلول اللي قدامك قبل ما تسمع القطع ما هو موضوع الاستماع و ممكن ايه هو السؤال اللي هايكون اجابته في وسط الاجابات اللي انت هاتختار من بينهم .


Skill 21- Determine the topic Skill 20 – determine Who, What, Where and what.
Skill 22 – Listen for Answers in Order
أظن مش محتاجين شرح ودول بقى بعد ماتستمع للقطعة والمهارة رقم 22 معناها ان الااسئلة عن القطعة هاتكون بترتيب قراءتها عليك( يعني السؤال الاول هايكون عن بداية القطعة و السؤال الارابع هايكون عن نهاية الحوار او القطعة )

الـقــراءة
READING COMPREHENSION

( وقته 55 دقيقة – مكون من 5 قطع وكل قطعة عليها 10 اسئلة MCQ)

نصائح عامة: 

1- الوقت دائما امام عينيك حتى لا تنسى نفسك في حتة معينة اكثر من اللازم. 2- خذ فكرة عامة عن الاقطعة والفكرة العامة ليها بدون تعمق قوي في القطعة. 3- عليك بايجاد السطور في القطعة التي بها اجابات عن السؤال ( وده في معظم الاسئلة مش كلها ) 

أنواع الاسئلة : 

احنا ممكن نقول ان جميع الاسئلة تدور حول محورين 

الاول : اسئلة عن معلومات تعطيها لك القطعة او تفهمها منها Information in the passages 
الثاني : اسئلة لغوية Vocabulary questions يعني مثلا معنى كلمة , تعريف لكلمة وهكذا

عايزين تفاصيل اكثر؟؟ 

نقسمها بقى : 

A- Questions about the IDEA of the passage: 
1- Main idea.الفكرة العامة

2- Organization of ideas all over the passage.هل ترتيب الافكار في القطعة( زمني – ملخبط – رأيين مختلفين .. هكذا ) 3- Answer stated details.الاجابة عن سؤال اجابته موجودة بالنص في القطعة 4- Answer unstated details. الاجابة عن سؤال اجابته غيرموجودةفي القطعة لكن مفهومة من سياق الكلام 5- Find pronoun referents.يعني يديلك ضمير في سطر معين ويقول لك الضمير ده يعود على مين؟ 


B- Indirect Questions: 
1- Implied details.يعني برده استنتاجات من القطعة

2- Transition questions.يقولك لو فيه قطعة قبل القطعة اللي قدامك او بعدها تتوقع تكون بتتكلم عن ايه؟ 


C- Vocabulary Questions: 
1- Find directions from structural clues.

يعني مثلا لو جاب كلمة وبعدها شرطة_ ده يبقى معناه ان اللي بعد الشرطة هو تعريف للكلمة قبل الشرطة ( يعني من الاخر خللي بالك من علامات الترقيمو الاختصارات زي 


i.e. - : - etc. - , - وهكذا 2- Determine meaning from word part.كلمة صعبة مش عارف معناها خذ جزء منها انت عارفه وابني عليه باقي الكلمة 3- Use context to determine meaning of difficult words.يعني استخدم سياق الكلام لمعرفية معنى كلمة معينة عن طريق تخمين معناها. 

D- Overall Review Questions: 
1 – Determine where specific information is found.بيعطيك معلومة معينة ويقولك المعلومة دي ذكرت في اي سطر من القطعة

3- Determine TONE

يعني القطعة مجرد خبر و لا رأي و لا نقد , PURPOSE يعني القطعة هدفها ايهو عايزة توصلك لايه or COURSE(تاريخ – سياسة – اقتصاد .....)يعني ممكن تتاخد في اي فصل 

طبعا انا كان بودي اني الخص لكم جزء القواعد لكن فعلا الوقت صعب وجزء القواعد كبير وكان نفسي انزل الموضوع لما يكمل خالص .. لكن ما لا يدرك كله لايترك كله . 

ملحوظات اخيرة : 
• برجاء من الزملاء الذين خاضوا امتحان التويفل ان يساهموا في الموضوع سواء بتجاربهم او بتصحيح اي شيء اكون اخطأت فيه بالموضوع ( وليس منا معصوم عن الخطأ)
• على كل من المسجلين في جامعة معينة معرفة هم بيقبلوا شهادة التويفل منين لان عادة الجامعة بتعوز الشهادة من عندها ( طبعا علشان الفلوس تدخل عندهم زي جامعة بنها مثلا )
• الكتاب كبير جدا حوالي 600 صفحة لاتقرأه كله اقرا العناوين الكبيرة تحت مسمى Skillsواقرأ شرحها والمثال اللي عليها .. لان الكتاب محشو بتمارين كثيرة جدا جدا وبكده هاتوفر على الاقل 400 صفحة من الكتاب واللي عايز يزود يزود براحته.
• ان شاء الله لو ذاكرت 3 ساعات يوميا لمدة اسبوع هاتجيب سكور عالى جدا ان شاء الله.

بالتوفيق للجميع إن شاء الله

أحمد طاهر