موضوعات للمهتمين بصناعة الدواجن Topics for poultrymen( Breedrs, Smallholders, Resarchers, Students ) in poultry industry

 

 

الاهمية الاقتصادية



1 - دورة راس المال سريعه حيث يتم البيع فى 45 يوم وكمية العلف المستهلكه فى حدود 450 الى 500 جرام ويصل الوزن الى 150-180 جرام فى نهاية ال 45 يوم واقل .

2- طبعا قلة التكاليف

3- مصدر للبروتين الحيوانى
4- انتاجه عالى من البيض يصل الى 250-300 بيضه
5- مدة التفريخ تصل الى 16 الى 17 يوم
6- يتحمل الظروف لا يتحملها اى طائر وعن تجربه
7- طائر السمان النضج الجنسى مبكر اقل من 45 يوم

مميزات بيض و لحم السمان


يمتاز لحم طائر السمان بأنه طرى ناعم خالي من الكولسترول سهل الطهي مستساغ ويتميز بيضه بمزاق البيض البلدى المربى فى المنازل ليس به اى رائحه ونلاحظ ان نسبة الصفار مرتفعه كما ان الانتاج الغزي يميزه .

انواع طائر السمان

يوجد نوع يسمى امريكى وياباني واسترالي وافضل الانواع من وجهة نظرى من حيث انتاج البيض واللحم هو السمان الياباني

طيب علشان نبدا مشروع اول الخطوات هنعمل ايه


اولا- المكان
طبعا لو مشروع صغير انا مش هتكلم عن الحجات القياسيه لا انا هتكلم لو حد عاوز يربى ويعمل مشروع صغير او كبير يعنى لو عندك مثلا مكان 50 متر مربع هنصمم عليه المشروع لان السمان المتر المربع بيكفى حوالى 50 طائر من عمر يوم حتى عمر التسويق اللى هو 45 يوم كده المكان طبعا بعدين هنقسم المكان .

ثانيا - مصدر السمان

اى مصدر موثوق به ممكن نجيب بيض او سمان عمر 45 يوم يبيض على طول طيب انا برشح طبعا ان تجيب بيض لان سعر البيضه 35 قرش يعنى الف بيضه ب 350 جنيه طيب لو حبيت تجيبه سمان طبعا الإلف يكلفك 5000 الف جنيه لو عمر 50 يوم بس طبعا دى ليها مميزات ودى ليها مميزات .




بعد ما جبنا البيض او السمان
هنعتبر اننا جبنا البيض هيبقى محتاجين مفرخه طيب سعر المفرخه يتراوح مابين 1800 ال 8000 جنيه طيب خلينا فى 1800 ودى صورتها



دى زى ما انتو شيفين فى الصوره بتشيل 7 ادرج سمان الدرج بيشيل 175 يعنى فى حدود 1200بيضه وممكن نضاعفهم لو حطين درجين فوق بعض زى اللى فى الصوره طيب فى مشكله ان المفقس بتاعها صغير دى ولا مشكله ولا حاجه بسيطه جدااااا ليها حل بسيط قوووى هندخل البيض فى السيتر (الحاضنه ) على دفعات معلش انا بكلم باللغه العاميه علشان كلامى يكون واضح شويه هو السيتر اللى هو الجزء اللى فوق فى المفرخه اللى بنحط فى البيض لمده 15 يوم والهاتشر هو الجزء السفلى اللى فى المفرخه يعنى الهاتشر عيب المفرخات دى ايه ان الهاتشر والسيتر مع بعض بس زى ما قلنا هندخل على دفعات طيب هندخل كل 3 ايام 500 يعنى خلال 12 يوم هندخل 2000 ننزل 500 الاولى فى الهاتشر وبعد كده ندخل غيرهم فى السيتر وهكذا واللى مش هيستوعب النقطه دى انا على استعداد انى اشرحها له اذن راس المال المطلوب حاليا 350 جنيه بيض + 1800جنيه مفرخه + 150 جنيه عربيه هتجيب المفرخه كده الاجمالى
2300 جنيه مصري طبعا


عندنا المفرخة وعندنا البيض طبعا حرارة تحضين السمان 37.7 هزود الماء فى المفرخه وشغلها قبل ما احط البيض بيوم على اقل تقدير بعد زالك يتم تجميع البيض و انتخاب البيض دى صوره لرص البيض وانتخابه








ده فيديو مجمع


طيب لو عندنا البيض فى مبرده لازم درجة حرارة المبرده متزدشى عن 15 درجه مئويه والنخزين لمدة 6 الى 7 ايام ولما نخرج البيض من المبرده هنسيبه فى درجة حرارة الغرفه لمدة 8 سعات حتى يكتسب البيض درجة حرارة الغرفه .

يتم رص البيض فى الادرج حيث تكون الناحية المدببة الى اسفل والعريضة الى اعلي يتم وضع البيض فى المفرخه .



************************************************** *****************

الان يجب تجهيز المكان او العنبر لاستقبال السمان عمر يوم من المفرخه اولا يجب تجهيز غرفه ولو تكن 2 متر مربع او 3 متر مربع حسب المتوفر وتكون مجهزه ب عدد 5 اطباق بلاستيك سعر الطبق لايتعدى 4 جنيه عدد 5 ساقيات مياه لتر سعر الواحده 5 جنيه تقريبا يتم طبعا تطهير الغرفه بالماء السخان مره ثم بالفنيك ونتركها تجف ثم نرش جير حى على الارضيه وبعد ذالك يتم فرش التبن ويفضل التبن مع السمان وانا لاافضل النشاره عموما يمكن تطهير الغرفه باستخدام ( 30 سم فورمالين +17.5 جرام برمنجنات بوتاسيوم + 50 سم ماء ) لمدة ساعه طبعا لو عملت كده ميكنشى موجود فى الغرفه اى شئ من الادوات التى سوف تستخدم يعنى ( السقايات + العلفات ....الخ )

انتهينا من التطهير
هنجط فى السقيات ماء وسكر يعنى كل سقايه حوالى معلقتين سكر او 10 جرام للتر ده فى اول 4 سعات وده علشان نتلاشى ظهور السالمونيلا والايكولاى علشان طبعا السمان يستهلك البروتين اللى موجود فى كيس المح ومن المهم فى اول 4 سعات انك تدخل بنفسك وتعمل على تحريك السمان حتى يستهلك البروتين الموجود فى كيس المح .

انا بحضن عموما على مضاد حيوى ثنائى الغرض معوى وتنفسى وفى امثله كتيير بس اهم حاجه يكون معوى وتنفسى ( ايفتريل – انروسين .....الخ ) زى ما قلت اى حاجه معوى وتنفسى ده لمدة 3-4 ايام بعد كده انا بحط فيتامين وانا بكلم عن تجربتى الشخصيه و بحط فيتامين اد3ه بس ياريت اجيب نوع كويس فى 130 جنيه وفى ب 17 جنيه سائل




انا بجيب من اللى سعره 26 جنيه الحمد الله شغال كويس بحط سم للسقايه اللى هى لتر طبعا

ملحوظه :- يتم وضع ظلط فى الساقايه بس مش من جوه طبعا بعدما يتم قلبها يتم وضع ظلط على الاجناب علشان
السمان بيكون صغير وعلشان ميغرقشى .

************************************************** *****

طبعا العلف
من عمر يوم الى ال 45 يوم ده طبعا علف تسمين غير البياض
اولا التسمين :- انا هعملها لل 100 كيلو

60 ذره + 28 صويا +10 مركزات تسمين + 2 كيلو زيت صويا + نص كيلو املاح وفيتامينات + ممكن تحط مضاد كوكسديا وممكن لا انا بصراحه مش بحط بس لو حبيت تحط هيوكن 200 جرام للطن يعنى ال 100 كيلو 20 جرام + 2 كيلو ثنائى فسفات الكالسيوم + ملح طعام حتحط 2 كيس الكيس 350 جرام مش فاكر حاجه تانى لو لفتكرت هبقى اعدلها


ثانيا البياض :- لل 100 كبلو

65 ذره + 22 صويا 10 مركزات بياض + نص كيلو املاح وفيتامينات + مضاد للكوكسديا ضرورى ( امبورال – امبورليم – فيتاكوكس ) ممكن فى العلف او الماء طبعا 20 جرام لل100 او 200 للطن +2 كيلو ثنائى الفسفات + 2 كيس ملح طعام + نص كيلو بريمكس بياض
ده بالضافه اننا هنحط اد3ه على فترات مش باستمرار

طبعا العلف ممكن تجهزه فى مجرشه افضل بس ليا ملاحظه بسيطه لازم المكونات الصغيره زى الاملاح المعدنيه والفيتمينات ومضاد الكوكسديا والثنائى وملح الطعام والبريمكس وغيره يتم خلطهم مع 10 كيلو علف خلط جيد يدوى لمده طويله وبعد كده يتم اضافتهم على باقى العلف ويتم التقليب .





************************************************** ****


كده العلف موجود والسمان غرفة التحضين طبعا هنزودها بدفايه يدويه بتشتغل بالكهرباء ودى مش هتكلف 10 جنيه انا بعملها على اديا + شعله غا ز انبوبه كبيره طبعا درجة حرارة التحضين لا تزيد عن 36 الى 37 وطبعا هتعرف ان السمان متاقلم مع درجة الحراره او لا عن طريق الانتشار يعنى لو منتشر هيبقى كويس لو متجمع على الدفايه هيبقى درجة الحراره قليله
والعكس صحيح وده هنشوفه من الفديو والصور طبعا


طبعا الاضاءه علشان مش انسى اول ثلاث ايام انا بشغلها على طول لاكن بعد كده بفضل اخفض فيها لحد متوصل ل 14 ساعه

طبعا
السمان هيفضل فى غرفة التحضبن حتى عمر 15 يوم طبعا فى تربيه ارضيه وفى تربيه فى بطاريات طلعا التربيه الارضيه تكاليفها اقل ولاكن مشاكلها كتييره ولاكن التربيه فى بطايات تكاليفها اعلى ولاكن مشاكلها اقل


طبعا فى بطاريات للسمان عمر يوم حتى 15 وفى بطاريات من عمر التسمين حتى البيع وفى بطاريات للبياض .



طيب انا هتكلم عن بعض المشاكل التحضين
فى من 3 الى 4 مشاكل ممكن يوجهونا وهما
1- ارتفاع نسبة النافق وده ناتج من عدم التحضين على مضاد حيوى قووووى او انه يكون فى مشاكل فى ماكينة التفريخ يعنى الماكينه تكون حامله للامراض فتنتقل الامراض من الماكينه الى البيضه وهكذا الاهمال يعنى ان المسئول عن المكان لا يهتم برفع النافق اول باول مما يؤدى الى نقر السمان فيه وانتشار الامراض .
2- ان ترتفع درجة الحراره او العكس مما يؤدى الى فقدان الشهيه
3- العلف غير جيد يؤدى الى مشاكل لا حصر لها ومنها ضعف عام للطيور كساح اوزان غير قياسيه بنهاية الدوره زيادة النافق .
4- ادخال اعمار مختلفه
5- عدم التطهير اول باول حيث ان الدورات سريعه مما يؤدى الى انتشار الامراض
6- عدم تغيير المياه مما يؤدى الى ارتفاع درجة حرارتها وتؤثر على الطائر
7- لابد من وضع سلك شبك واسع من عمر 5 ايام حتى 15 يوم لان طائر السمان له عاده سيئه وهى عادة ( النكش ) مما يؤدى الى فقد فى العلف


************************************************** *********

ننتقل الى غرفة التسمين


يجب الا تقل درجة الحراره عن 25 درجه مئويه وبعد عمر 21 يوم درجة حرارة الغرفه هتكون مناسبه
طبعا يتم تقديم نفس علف التسمين مع مرعاة زيادة العلفات وزيادة السقايات ووضع السقيات على طوب او لو التربيه فى بطاريات لا نحتاج الى ذالك طبعا يتم قياس اوزان السمان اولا باول


هنستخدم قيتامين اد3ه خلا هذه المده ( 25 يوم ) حوالى مرتين يعنى 6 ايام فقط



كما يمكن تربية السمان المخصص للتسمين فى بطاريات

وده جدول بيوضح استهلاك العلف من عمر يوم حتى عمر اسبوع

ويصل وزن السمان الى 180 جرام




وطبعا دى صور لعملية ذبح واعداد السمان



************************************************** *********

ننتقل الى غرفة البياض

طبعا غرفة البياض نسبة الذكور الى الاناث لابد ان تكون ذكر الى 2 انثى وده افضل او التربيه فى بطاريات ذكر لانثى
طبعا هنستخدم علف البياض
طيب

تمييز الجنس فى السمان


انا عملت حاجه بسيطه وسهله جدااا جدااا مش كلام لا بالصور والفيديو هنتكلم الاول وبعدين نشوف الصور والفيديو
اولا فى طريقتين

الاولى عن طريق بسيطه وهى ان الذكر يتميز بان الريش الذى يوجد فى صدره يميزه اللون البنى المحمر اما الانثى فيميزها ان الريش ابيض به نقط سوداء ولاكن عن تجربه هذ القاعده ليست ثابته



الثانيه وهى الطريقه اليابانيه وهى من ادق الطرق المتبعه حيث يقلب الطائر على ظهره وتفحص فتحة المخرج حيث يتميز الذكر عن الانثى بوجود غده تسمى كلوكا ام الانثى فلا يوجد بها الغده ويتم التمييز فى عمر اسبوعين








كده عرفنا الفرق بين الذكر والانثى

يتم جمع البيض اول باول يعنى كل يوم


ده
فيديو للتربيه الارضيه


ودى فيديوهات للتربيه فى بطاريات




طيب زى ما شفنا التربيه فى بطاريات والتربيه الارضيه








اخر حاجه موضوع جمع البيض طبعا مفيش اسهل منه
يتم اختيار البيض الصالح للتفريخ الخالى من الكسور ذو حجم طبيعى لابد ان يكون نظيف يصل وزن البيضه الى 9 جرام تقريبا ووزن الكتكوت عمر يوم حوالى 6 جرام
*************************************************
اخيرا يستهلك الطائر البياض فى حدود 40 الى 50 جرام علف يوميا من الاسبوع التاسع واعلى فترة انتاج للسمان تستمر لمدة 7 شهور

المصدر: المصدر: الموسوعة الزراعية الشاملة الخيرات الزراعية
Khairy4712

Dr.Khairy

  • Currently 7/5 Stars.
  • 1 2 3 4 5
2 تصويتات / 8752 مشاهدة
نشرت فى 2 سبتمبر 2012 بواسطة Khairy4712

ساحة النقاش

khairy abd-El-Hameed

Khairy4712
يحتوى الموقع على الأقسام المختلفة للدواجن وتشمل الدجاج-الرومى-الحمام- النعام -الطيور المائية. مع الاهتمام بالموضوعات ذات الأهمية فى الوقت الحاضر مثل موضوعات البيئة- المخلفات(الزرق والأمونيا....الخ) وتجد مجموعة من الكتب التى تغطى بعض الموضوعات المعاصرة وذات القيمة العملية وهذه فى صورة ملفات تحميل ولقد حرصت على اللغة الأنجليزية فى المرحلة التمهيدية وسنوالى »

ابحث

تسجيل الدخول

عدد زيارات الموقع

633,959