يا فتاح يا عليم يا رزاق يا كريم اصطبحنا وصبح الصباح اهو كل يوم نبدا يوم جديد ننظف العدة ونغسل الباب ونرش المية بالملح ونولع البخور وبرضة مفيش فايدة ايوة الحالة نايمة قوى وكل يوم يعدى بنتخنق كل اللى بعمله اشرب شاى واشخط فى اى حد يقف قدامى ابعد ياعم اركن عربيتك بعيد يا سيدى شيل ام المكنه الصينى دى من هنا هعمل ايه ماحنا قاعدين قاعدين لا شغله ولا مشغله مهو من ايام مالبنوك فلست فى امريكا يفحمها مطرح مهى قاعده واحنا كل يوم فى النازل كل حاجه بترخص الا الخشب عمال يغلى لما خلاص الواحد قرف والمستوردين علشان ميخسروش راحوا جابوا خشب منيل لو عصرته تاخد ميه انما ايه بالكيلو واحنا نفضل نشمس الخشب ونتشمس جمبه واخر المتمه ينشف ويبقى زعزوعة وناس تانية تلاقيها عمالة شغاله وتبيع وتشترى واحنا قاعدين .....لا ء لاء لاء متفهمونيش غلط انا مش بقر عليهم انا بس لو عاوز هلاقى الف وميه بيشغلونى واشغلهم بس انا احب اخد كاش على الحساب ده معرفوش هى ناقصه اننا نشكك كمان النهارده انا مشيت صنايعى قلت له روح ارزق فى حته تانية معدش عندى غير الواد زيكو واد صغير وانا اللى مربية اهو ينظف يولع الغراية يعمل اى منكش علشان الناس تحس اننا شغالين اعمل ايه مهو وجع قلب بس ده السوق وهى دى الدنيا الله الله الله ايه العربية النظيفة اللى بتركن دى ......يتبع