حصريـــاً النص الرسمى لاعترافات الجاسوس المصرى

الرجوع إلى قائمة المقالات

كشفت التحقيقات مع المتهم طارق عيسي حسن المتهم بالتخابر لصالح اسرائيل عن مفاجأات كثيرة
حول ماكان يقوم به وما يطلب منه من تعليمات من الموساد ومن اهمها تاكيد طلب الموساد علي تجنيد عناصر من مصر وسوريا ولبنان وايران واختصت الطلبات بالتأكيد علي طارق في تجنيد مصريين يعملون في مجال الاتصالات في اكبر الشركات في مصر فودافون ومبينيل واتصالات
وهذا هو النص الرسمي لاعترافات طارق في سراي النيابة

س: ما قولك فيما هو منسوب إليك من اتهام؟ "أفهمناه"
ج: ايوه حصل.
س: قررت بأنك عقب لقائك مع ضابط الموساد ايدي في دولة مكاو في شهر 3/2010 في تنفيذ ما كلفت به من إنشاء موقع الانترنت بطلب عاملين في مجال الاتصالات في مصر عدت بعدها إلي دولة الصين فما الذي فعلته عقب ذلك؟
ج: بعد ما رجعت من دولة مكاو إلي الصين في شهر 3/2010 قعدت في الصين أمارس حياتي الطبيعية وفي شهر 6/2010 لقيت الضابط ايدي بيكلمني وبيقول لي تعالي علي هونج كونج وفعلا رحت هونج كونج لقيته بيقول لي احنا عايزين نجند ناس من لبنان بس من الشيعة وراح مطلع خريطة للبنان وقعد يشاورلي علي أماكن وجود الشيعة بلبنان وقال لي احنا هنزل علان علي الانترنت لشركة زي اللي عملناه مع الاتصالات في مصر وهنعمل موقع كبير جدا عايزين موظفين من الموارد البشرية من اللبنانيين ومعلومات عامة عن الشركة وهيبان من الناس اللي هتتقدم الديانة التي تعتنقها واحنا هنديك الباس ورد أو الموقع علشان لما تيجي لك الإيميلات هنفرز الطلبات ونقدر نشوف من اللي يصلح يشتغل معانا فقلت له أنا موافق وقال احنا هننشيء الموقع وهبقي ابعث لك الرقم السري بتاعه فقلت له خلاص انا هستناك فبعث لي الرقم السري ولقيت الضابط ايدي بيقول لي انت هترجع تاني علي بكين بعد كدة لغاية ما ابعت لك الموقع والباس ورد بتاعه وقعدنا نتكلم.
س: هل أبلغك الضابط ايدي باسم الموقع وسلمك الرقم السري؟
ج: ايوه أنا لما رجعت بكين لقيت الضابط ايدي باعث لي الايميل علي الموقع وأنا مش فاكر اسمه وبعث لي الرقم السري للدخول علي الموقع علشان أشوف طلبات الباحثين عن عمل في لبنان.
س: وهل قمت بالاطلاع علي هذا الموقع علي شبكة المعلومات الدولية؟
ج: ايوه.
س: وهل تلقيت ثمة طلبات عبر الموقع المشار إليه للباحثين عن وظائف شاغرة في دولة لبنان؟
ج: ايوه أنا لقيت في طلبات كتير جدا مش من لبنان بس ومن دول عربية كثير جدا.
س: وهل قمت بفرز تلك الطلبات لبيان مقدم الطلبات هل هم من معتنقي الفكر الشيعي من عدمه حسب توجيهات الضابط ايدي لك؟
ج: أنا فتحت الطلبات بس مش فاكرها.
س: ألم يبلغك الضابط ايدي ما هي الغاية من تجنيد عناصر لبنانية من معتنقي الفكر الشيعي؟
ج: الضابط ايدي قال لي احنا مهتمين جدا عايزين نشوف عناصر نقدر نجندها منتمية للفكر الشيعي علشان مشكلة إسرائيل مع حزب الله علشان هما عايزين يخترقوا حزب الله اللبناني.
س: ألم يبلغك الضابط الإسرائيلي خلال لقائه معك بدولة تايلاند بالاتصال برئيس تحرير جريدة الديار اللبنانية المدعو شارل أيوب والمرتبط بعلاقة مع حزب الله اللبناني وإيران مدعيا أنك تعمل باحدي الشركات العاملة في مجال الاعلان لتوثيق الاحداث في الشرق الأوسط وترغب في إجراء لقاء أو اتصال تليفوني معه حيث قمت بالاتصال بسكرتارية الجريدة وتترك عنوان بريدك الالكتروني الذي انشأه لك ضابط الموساد ايدي في هذا الغرض كما كلفك باستخراج أوراق تلك الشركة واستئجار مكان لها بالصين وسلمك مبلغ 5000 آلاف دولار تكاليف تلك المهمة؟
ج: ايوه الضابط ايدي كلفني ان أكلم شارل أيوب أما بخصوص الضابط ايدي قال لي انشيء شركة اعلانية في الصين الكلام ده مش مضبوط.
س: وما هو قولك فيما ورد بأقوالك ان ضابط الموساد الإسرائيلي ايدي موشيه طلب البحث عن بيانات بعض اللبنانيين الشيعة العاملين في مجال المحاماة أو المهندسين في مجال الاتصالات والحصول علي بيناتهم كاملة؟
ج: ايوه حصل.
س: ما قولك من انك التقيت بضابط الموساد ايدي موشيه القائم بتشغيلك بتاريخ 21/6/2010 بمدينة مكاو بالصين حيث طلب منك تجميد نشاطك الاستخباراتي للفترة الحالية لحين صدور تعليمات أخري لك مما أصابك بالخوف والفزع تواكبت عقب الاعلان بتاريخ 26/2/2010 عن القبض علي عناصر يتجسسون لصالح المخابرات في لبنان مما دفعك للتقدم ببلاغ للسفارة المصرية في بكين في محاولة منك لتأمين نفسك؟
ج: الكلام ده مش مضبوط علشان أنا رجعت السفارة المصرية في بكين علشان اتقدم بالبلاغ في 21/6/2010 قبل الاعلان عن شبكة التجسس في لبنان.. اللي حصل علي ما اتذكر بالضبط لقيت الضابط ايدي تقريبا في شهر 4/2008 بيكلمني وبيقول لي تعالي علي بانكوك وبالفعل أنا سافرت علي بانكوك وأنا كنت نسيت اقول ان أول مرة سافرت فيها بانكوك مع الضابط ايدي أنا كنت جددت التأشيرة بتاعتي من ثلاثة شهور إلي خمسة شهور وده إجراء عملينه للناس اللي بتحب ترجع تاني بانكوك وبالفعل أنا سافرت بانكوك في بداية شهر 4/2008 بناء علي تكليف من الضابط ايدي موشيه لي وكان هو باعث لي علي الإميل بتاعي قال لي انزل في فندق في شارع سيلوم في بانكوك وهو فندق 4 نجوم وأنا أول ما نزلت في الفندق اللي الضابط ايدي قالي عليه وأول يوم نزلت مكلمنيش وثاني يوم الضابط ايدي كلمني وقال لي انت كمان ساعة تاخذ تاكسي وتيجي علي فندق في شارع سو 7 وتخش تشرب حاجة وأنا هاكلمك وبالفعل رحت علي الفندق اللي هو قال عليه ودخلت المطعم وقعدت مستني وبعدها بفترة كلمني وقالي خد تاكسي وتعالي علي فندق في شارع سو 22 في بانكوك وبالفعل وصلت لهذا الفندق وقابلت الضابط ايدي ورحنا قعدنا في ستاربارك وبدأ يسألني عن أحوالي بشكل عام والشركة اللي أنا أسستها وفي اليوم ده قالي احنا عايزينك في جريدة اسمها الديار اللبنانية ورئيس التحرير بتاعها اسمه شارل أيوب رئيس تحرير جريدة الديار اللبنانية وحكي لي عن شارل أيوب وقالي ان هو علي علاقة وثيقة بإيران وحزب الله اللبناني والقيادة السياسية بسوريا وان شارل أيوب بيتلقي دعما ماليا من ايران ومن القيادة السياسية بسوريا وقال لي ان شارل أيوب مابيسافرش غير مكانين سوريا وإيران وقاللي ان ربما يكون شارل أيوب حلقة الوصل بين القيادة في إيران والقيادة في سوريا وقال كمان حزب الله في لبنان وان هما محتاجين علشان يقدروا ياخدوا من شارك ايوب أي معلومات عن ايران أو حزب الله وقال كمان الضابط ايدي ان هما حالوا مع شارك ايوب من خلال ان هما عملوا موقع علي الانترنت وبعتوا له علي البريد الالكتروني بتاعه اميلات كتيرة علشان عايزين يستضيفوه في برنامج بكين شارك ايوب ومردوش علي الاميلات بتاعتهم والضابط ايدي ضابط الموساد الاسرائيلي طلب مني أنا أن أكلم شارل ايوب في التليفون وأقول له ان احنا بعتنا لك مرات عديدة علي الاميل بتاعتك ومبتردش وان احنا شركة بتشتغل في مجال الاعلام والانتاج وان احنا عايزين نقابله بحديث تليفزيوني وهيبقي المقابل المادي كبير وان احنا كمان هنستضيفه في فندق 5 نجوم وهنتحمل مصاريف الاقامة واقترح عليه ثلاث بلاد نقدر نسجل معاه الحديث التليفزيوني ده اما بالفلبين أو في كوريا أو في هونج كونج وبالفعل أخذت تليفون شارل ايوب من الضابط ايدي وهو أخذ تليفون مكتبه في لبنان وأنا كلمته علي التليفون رد علي سكرتير شارل ايوب وأنا قلت له ان احنا شركة اعلانات وعايزين نعمل لقاء مع الاستاذ شارل ايوب وان الشركة عندنا بعتت لكم أكثر من اميل ومردتوش وسكرتير الاستاذ شارل ايوب قال لي ابعت كل التفاصيل دي علي الاميل عن الشركة بتاعتكم ومكانها وتاريخ انشائها وأنا هاعرضها علي الاستاذ شارل ايوب وكلمني بكرة وأنا هاقول لك الرد والكلام ده كله حصل وكان الضابط ايدي قاعد معايا وانتهت المكالمة علي كده والضابط ايدي قال لي سيبني وأنا ها ابعت له علي الاميل وهنستني الرد بتاعه وانتهي اللقاء بيني وبين ايدي علي كدة وتاني يوم اتقابلنا أنا والضابط ايدي في فندق في شارع سو 7 في بانكوك وعلي باب الفندق الضابط ايدي قال لي انت هتدخل تقعد في مكان في الرسيبشن وانا هقعد في مكان بعيد عنك وهتلاقي واحد عربي حاول تتعرف عليه أقعد علي الترابيزة اللي جنبه وبالفعل دخلت قعدت علي الترابيزة اللي جنبه ومعرفتش أعمل حوار معاه لحد ما الضابط ايدي جه وسلم عليه وبعدها بدأ الراجل العربي ده يقولي تعالي أقعد معانا وقالي انت خايف ليه أول ما تدخل علي واحد عربي قاعد في مكان قوله سلام عليكم رد أو مردش مش مهم حاول الموضوع بسيط الضابط ايدي نبه انه شخصية مهمة جدا عندهم وانه شغال معاهم بقي له أكثر من 20 سنة والدكتور المصري ده قعد يعرفني بنفسه وحكي لي عن نفسه وعن العمليات اللي قام بها بأوروبا ولاحظت احترام ايدي الشديد ولاحظت احترام ايدي له ويبدو ان الرجل المصري ده علي علاقة وثيقة بالمسئولين الكبار بجهاز الموساد الاسرائيلي وقال لي ان هو بيفكر يستعين بي للدخول وسط جماعات اسلامية وأنا رفضت لأن الموضوع له علاقة بالدين وأنا أرفض العمل مع الجماعات الاسلامية وانتهي اللقاء علي اساس ان احنا هنتقابل بالليل علشان اتنصلا بجريدة الديار اللبنانية وأعرف رد شارل ايوب علي الاميل وهل يوافق علي الاشتراك في تصوير لقاءات بالخارج ولا لأ وبالليل اتقابلنا وفي حوالي الساعة 7.30 كلمت جريدة الديار ورد علي مازن سكرتير رئيس التحرير فقلت له أنا كلمتك امبارح وبعت لك اميل علشان كنا عايزين نعمل لقاء مع شارل ايوب رئيس التحرير فلقيت السكرتير بتاعه مازن بيقولي أنا افتكرتك وعرضت الموضوع علي نائب رئيس التحرير وها أحول لك التليفون عليه تكلمه بالفعل حوالي التليفون علي نائب رئيس التحرير وأنا مش متذكر اسمه ولقيته بيقولي ايه اللقاءات اللي عايزين تعملوها مع الاستاذ شارل ايوب والموضوعات التي هتطرحوها عليه قلت انا معايا واحد زميلي متخصص يفهم أكثر مني وهيكلمك ورحت مدي له الراجل المصري اللي اسمه الدكتور وانا معرفتش الا الاسم ده وكان ايدي قاعد وحاضر الحوار كله ولقيت الدكتور بيقوله ان اسمه سعد بس مش فاكر سعد ايه من مركز الدراسات بالأهرام وان هو عايز يكلم الاستاذ شارل ايوب ويشوف ايه المشكلة في ان هو يعمل معاهم لقاءات وان هما استضافوا شخصيات كثيرة ويهمهم استضافة الاستاذ شارل لأنه شخصية مؤثرة في لبنان واتفقوا ان الاتصال بينهم فيما بعد عن طريق التليفونات والأميل وانه هينتظر تليفون من الاستاذ شارل علشان يتكلم معاه مباشر ويشرح له كل التفاصيل وانتهت المكالمة علي كده وبعد كده لقيت الضابط ايدي والدكتور المصري ده بدأوا يتكلموا انجليزي مع بعض علشان هما عارفين ان أنا مبفهمش انجليزي بس أنا باعرف انجليزي بسيط واللي فهمته منهم بعد كده والحوار اللي دار بينهم ان الدكتور المصري ده هيسافر لبنان ويعمل حوار مع رئيس التحرير شارل ايوب ولقيت الضابط ايدي بيقولي انني أمشي دلوقتي وهنتقابل بكره الساعة 10 في ستار باك وبالفعل أنا سبتهم ومشيت ورحت للضابط ايدي في ستار باك ولقيته بيقولي احنا عملنا لك اميل علي الانترنت علشان هتتلقي عليه بيانات ناس بتشتغل في التجارة والناس اللي بتدور علي فرص عمل في سوريا في مجال التجارة في ثلاث تخصصات زيت الزيتون والحلويات الشامية وسوق العقارات بجانب الموظفين اللي بيبحثوا عن فرص عمل بالخارج.
أكدت التحريات السرية انه تم تكليف المذكور المتهم من الطرف الآخر الموساد بالبحث عن بيانات بعض اللبنانين الشيعة العاملين في مجال المحاماة أو مهندسين في مجال الاتصالات كما طلب منه محاولة الحصول علي بيانات تجار السلاح في مصر.
س: جاء بأقوالك السابقة عند انتهاء مأموريتك بسوريا تم اللقاء بالضابط ايدي بمقاطعة هونج كونج وأبلغته بمضمون تلك السفرية ثم عدت الي دولة الصين فما الذي حدث عقب ذلك؟
ج: أنا رجعت من هونج كونج الي الصين واعتقد ان الكلام ده كان في بداية شهر مارس 2010 وقعدت في بكين أمارس حياتي الطبيعية وكان في اتصالات وايميلات بيني وبين ايدي موشيه ولم يكن هناك تعليقات إلا في أواخر شهر 3 2010 كلمني الضابط ايدي وقال لي تعالي علي مكاو وتاني يوم سافرت من بكين الي مكاو ونزلت في نفس الاوتيل بسي مش فاكر اسمه وكلمت الضابط ايدي موشيه ورحت قابلته في اوتيل تاني ولقيته بيقول لي أنا عايزك تدور علي حد يقدر يشتغل معانا من مصر في شركات التليفون المحمول فودافون أو اتصالات أو موبينيل والموضوع ده مهم جدا علشان عايزين حد بيشتغل في المجال ده سواء مهندس أو في خدمة العملاء في الثلاث شركات دول لأن احنا مهتمين بقطاع الاتصالات في مصر في أي واحدة من الشركات دول وأنا قلت له أنا ما أعرفش حد في مصر بيعمل في مجال الاتصالات في مصر فقال لي ايدي موشيه سيبني أنا هقول لك بكرة أنا هعمل ايه لما نتقابل وفعلا تاني بيوم قابلت الضابط ايدي موشيه وكان معاه واحد اسمه جيفري وده اللي سبق قابلته لما كنت في سوريا وقعد يسألني عن الاجراءات الأمنية في سوريا ويكتب هذا الكلام ولقيت الضابط جيفري بيكلمني بالعربي والضابط ايدي موشيه كان بيترجم وقال لي الضابط ايدي أنا هعمل ايميل علي الانترنت وهنكتب في الموقع انا احنا محتاجين مهندسين ومختصين يعملون في مجال الاتصالات أو التليفونات المحمولة وده موقع بيطلب عاملين للعمل جوه مصر وهعطيك الرقم السري بتاعه علشان تشوف الطلبات التي ستقدم من مصر وتفرز الناس اللي تقدمت وتشوف اللي يصلح تشتغل معاه وبعد كده هنقول لك تعمل ايه معاه وكل شوية تبقي تدخل علي الايميل وتشوف الطلبات التي تقدمت من الثلاث شركات وقال لي الضابط ايدي ان الموضوع ده مهم جدا جدا وعايزك تهتم بالموضوع ده وتركز في الناس اللي متقدمة ويكون سبق لهم العمل في أي من الشركات الثلاث ويكون سبق لهم العمل في خدمة العملاء أو المهندسين الفنيين وتتابع علي طول الموقع ده وقال لي اكتب انت الاعلانات بنفسك وأنا قلت أنا هبقي أنزل الاعلان علي الانترنت وعملت ايميل والضابط ايدي والضابط جيفري أخذ الرقم السري علشان نتعامل مع بعض وبالفعل واحنا قاعدين أنا وايدي وجيفري عملنا الاعلان علي الانترنت باسم شركة هوشتك ومقرها هونج كونج وتعمل في الاتصالات والتكنولوجيا وكتبت يسرنا الانضمام الينا ولقيت ايدي بيقول لي انت ترجع بكين وكل شوية تفتح الايميل وتشوف الناس اللي قدمت طلبات علشان نقدر نفرز حد منهم يقدر يشتغل منهم معانا في مجال الاتصالات وأداني 800 دولار مرتب الشهر وتذاكر الطيران من مكاو الي بكين وقال لي ترجع بكين وتبقي تفتح الايميل وتشوف الطلبات اللي يصلح يشتغل معانا ورجعت بكين وكل شوية كنت افتح الايميل علشان أشوف الباحثين عن عمل علشان أفرزهم.
س: هل أبلغك الضابط ايدي وجيفري عن سبب اهتمامهم بتجنيد عنصر من العاملين في مجال الاتصالات في مصر؟
ج: أيوه طبعا لأن الموساد مهتم جدا بتجنيد عناصر في مجال الاتصالات علشان بحكم تعاملي مع ضباط الموساد والضابط ايدي كان فيه تحذيرات في استخدام التليفون المحمول بمعني ان أنا في استخدامي للتليفون المحمول وأنا بكلم ايدي علي المحمول يبقي بيني وبينه فقط وأنا من خبراتي معهم علي مدار الفترة اللي فاتت ان أي تليفون خاصة الحديثة من السهل جدا ان أنا أراقبها وأعرف صاحب التليفون مكانه فين ولذلك التكنولوجيا الحديثة خاصة في مجال الاتصالات متقدمة جدا وعلشان كده جهاز الموساد عايز يجند عناصر من مصر في مجال الاتصالات لأن من خلالها يقدر يعرف أرقام مسئولين كبار في الدولة ورجال أعمال ومسئولين في قطاعات مهمة في الدولة يقدروا يعرفوا أرقام تليفونات مهمة خاصة ان التليفونات الحديثة فيها خدمة الانترنت لأنه يقدر من خلال الأجهزة الحديثة يخترق شبكة الانترنت لو توصل الي رقم هاتفه ويقدر من خلالها يعرف مكانه والاتصالات اللي بيقوم بيها والأشخاص اللي يعرفهم ويقدر يتصنت علي التليفون علشان كده كانوا مهتمين جدا انهم يجندوا أي عنصر من الثلاث شركات بتاعة الاتصالات.
س: وماذا كان رد فعلك حيال ذلك التكليف الصادر لك بمحاولة تجنيد عناصر مصريين من العاملين في مجال الاتصالات في مصر؟
ج: أنا قلت للضابط ايدي خلاص نعمل الموقع وبالفعل أنا وايدي جيفري أنشأنا موقع الانترنت للباحثين عن عمل في مجال الاتصالات واختارنا اسم شركة وهمي هو هوشتك.
س: من الذي أنشأ هذا الموقع؟
ج: أنا والضابط ايدي وجيفري.
س: ما هي البيانات التي حررتوها علي الموقع؟
ج: احنا كتبنا علي الموقع ان احنا شركة هوشتك تعمل في مجال الاتصالات في هونج كونج ونرحب بالانضمام إلينا للعمل معنا.
س: وما هي الغاية من إنشاء ذلك الموقع علي شبكة المعلومات الدولية؟
ج: طبعا الهدف زي ما قالت ان احنا بنبحث عن مهندسين وموظفين في خدمة العملاء بيعملوا في شركات المحمول الثلاثة في مصر لمحاولة تجنيد أي مصري يعمل كمهندس أو في خدمة العملاء.
س: متي تم إنشاء هذا الموقع؟
ج: في أواخر شهر 3 .2010
س: هل تلقيت طلبات للعمل بتلك الشركة؟
ج: أيوه
س: وكم عدد الرسائل الاليكترونية التي تلقيتها من خلال هذا الموقع؟
ج: علي ما أتذكر حوالي سبع طلبات أو عشرة وعلي ما أتذكر اني تلقيت من مصر حوالي أربع طلبات مهندسين وعاملين في مجال الكمبيوتر.
س: هل تتذكر أسماء مقدمي تلك الطلبات؟
ج: لأ
س: هل أبلغت المدعو ايدي موشيه بتلك الرسائل التي تلقيتها؟
ج: أيوه علي البريد الالكتروني بتاعي.
س: وماذا كان رد فعل الضابط ايدي ضابط الموساد؟
ج: قال أنا مش عجباني الطلبات اللي جت لأن مش دي اللي احنا عايزينها وطلب مني البحث في طلبات أخري أوضح.
س: وهل استجبت لطلب المدعو ايدي ضابط الموساد لتغيير البيانات الواردة علي الموقع الالكتروني؟
ج: لأ
س: وما هي العلة؟
ج: علشان أنا معرفش كنت رافض ومكنتش مرتاح لتجنيد عناصر من مصر علشان كده مكنتش مهتم.
س: وهل قام المدعو ايدي ضابط الموساد بتغيير تلك البيانات علي الموقع؟
ج: أيوه لقيت الضابط ايدي كتب بيانات جديدة علي الموقع كتب نرغب في مهندسين وموظفين اتصالات في خدمة العملاء للانضمام الي شركة هوشتك.
س: وهل تقاضيت ثمة مبالغ مالية في هذا الأمر؟
ج: لأ
س: وما قولك من ان الضابط ايدي كلفك بوضع اعلانات جاذبة لتشغيل العمالة في الخارج علي مجموعة كبيرة من المواقع والمنتديات تشمل عدة دول عربية وايران في مختلف التخصصات وكلفك بفرز تلك المواقع المهندسين يعملون في مجال الاتصالات وهي إدارة الدعم الفني لشركات المحمول في كل من مصر ولبنان وسوريا حيث قام المتخصصون في جهاز الموساد بإنشاء موقع لهم باستقبال بيانات راغبي العمل في هذا المجال.
ج: أيوه حصل.
س: وما قولك بأن الضابط ايدي موشيه كلفك باستخدام عناوين بريد الكتروني التي أنشأها لك عبر شبكة المعلومات الدولية لاستقبال بيانات راغبي العمل في الخارج للمصريين الراغبين في العمل بجميع المجالات وكذا المهندسين العاملين بالدعم الفني لشركات الاتصالات والمحمول المصرية تضمنت البيانات الأساسية وعناوين البريد الالكتروني وأرقام الهواتف والمؤهلات الدراسية وصور شخصية وكلفك بفرزهم وارسالهم وتحديد أنسابهم للاتصال بهم واستكمال اجراءات تجنيدهم لصالح جهاز الموساد الاسرائيلي.
ج: أيوه حصل
س: أكدت التحريات السرية من ان الطرف الآخر الموساد وجهه المتهم للاقتراب من العاملين بالسفارة المصرية ببكين بغرض دفعهم لشراء أجهزة كمبيوتر جديدة وبأسعار مخفضة حيث سيقوم القائم بالتشغيل الضابط ايدي بإمداده بأجهزة مزودة ببرامج تسمح لهم بالتنصت علي كل ما يتداول عليها من معلومات وذلك أثناء خطة الإحلال والتجديد لأجهزة الكمبيوتر بالسفارة المصرية.