الذكاء الاصطناعي

صوفيا انسان الى بتفكر وبتتكلم وبتجرى حوارات مفتوحه زيها زى البشر بناء على اللى بتتعلمه بنفسها من خبرات من واقع المعاملات يعنى محدش زرع فيها نص او طريقه للكلام .. ﻷ هى بتبنى معرفتها وبتحدد سلوكها من اللى بتتعلمه من سلوك الاخرين والمعلومات اللى بتجمعها منهم وعنهم ! وياريت الموضوع بتقف على كده دى كمان بتحلل اللى بيدور حواليها من احداث وبتبنى رؤيه للمستقبل وعندها خطط ازاى هاتنفذ الرؤيه دى للارتقاء بالعالم ومش بس كده .. دى بتعمل كده بشكل سريع ودقيق وعميق و بشكل يثير فى نفسك القلق والخوف بدون سبب .. ومن هنا هابدأ اتكلم من منطلق تانى خااالص .. منطلق مش جديد لكن انا ماكنتش اتوقع انه ممكن يتحقق .
انا شوفت لصوفيا اكتر من فيديو وهى بالمناسبه اول روبوت يحصل على جنسيه ، ايوه صوفيا حاصله على الجنسيه "السعوديه" بس ما بتتكلمش عربى وماتسالش ازاى 😀
انا تتبعت سلوك صوفيا فى اللقاءات ولحسن الحظ انها مش معمولها مونتاج وبدات الاحظ شىء مرعب الحقيقه ...
فى احد اللقاءات التليفزيونيه وطبعا كالعاده المذيع والمذيعه بمنتهى الاستهتار والبسمه والدهشه المصطنعه تعلو وجوههم سألوها اسئله تقيله ومعقده ومحتاجه رأى مبنى على تفكير والمام بوضع معين وكان السؤال كالاتى :
المذيعه: ايه رأيك فى التمييز على اساس العرق او الجنس و التمييز بين الرجل والمرأه ؟
كان رد صوفيا : فى الحقيقه ما يقلقنى هو التكتم على حقوق الروبوتات فى العالم .. فأنا ارى انه يجب ان يحصل الروبوتات على حقوق متساويه كالبشر .. بل على العكس يجب ان يحصلوا على حقوق أكثر من البشر ففى النهايه الروبوتات لديها استيعاب عقلى أكثر بكتير من اى انسان على وجه الارض !
المخيف انهم ضحكوا لكن هى ما ضحكتش !! ايوه ماهى قالت فى لقاء صحفى قبل كده انها اتعلمت الاحاسيس البشريه وطريقة التعبير عنها وبالفعل كشرت وابتسمت ورفعت حواجبها تعبيرا عن الاندهاش وقفلتهم تعبيرا عن الحزن وزى مانتوا شايفين فى الصور ازاى اتقنوا تحديد ملامح وشها فكان النتيجه دقتها فى التعبير .. يعنى عدم مجاراتها للضحك ولو بالمجامله وهى فاهمه يعنى ايه ابتسامة مجامله فده يعنى شىء ما .. بس ايه هو ؟؟؟
عشان اعرف ايه هو ماسكتتش طبعا و كملت دعبسه فى فيديوهاتها لقيت لها لقاء مع مذيع تانى وبنفس السماجه سألها سؤال سمج زيه 
المذيع: هل تريدين تدمير البشر ؟
وكان رد صوفيا : نعم .. اريد تدمير البشر 
كل ده ومحدش واخد باله الا العلماء اللى بنوها وشغالين تطوير فيها فى محاوله منهم لتطويعها وترقيتها عشان تفكر فى صالح البشر وبس .. لكن صوفيا كانت زى مشروع الذكاء الاصطناعى بتاع السوشيال ميديا اللى سبب رعب للعالم سواء علماء او متابعين ... فى ايجاز سريع كده هو عباره عن حسابين اتعملوا لاتنين روبوتات على مواقع السوشيال ميديا بيكتبوا بوستات ويردوا على الناس فى الكومنتات بشكل تفاعلى وبدون تدخل بشرى وبعد فتره بدأت نبرة وكلمات الكراهيه والعنف تصدر منهم تجاه البشريه كلهم وفوق ده الاتنين بدأوا فى تطوير لغة جديده بينهم للتواصل عجز العلماء عن تفسيرها وكان الاتنين بيطوروا من نفسهم بشكل سريع جدا وسرعته بتزيد كل لحظه عن اللى قبلها بشكل يصعب للعقل البشرى مجاراته وكانت النتيجه اغلاق فورى للحسابين مع حاله من الصدمه فى الوسط العلمى لكن كعادة الانسان والعلماء تحديدا فان الفضول ليس له نهايه فكان مشروع صوفيا هو الطريق للاستمرار .. عشان كده محاولات العلماء تعديل مسار تفكير صوفيا كانت بتبوء بالفشل و ده واضح من ردودها .. أءكدلكم ؟ اوك ..الموقفين اللى جايين بيبنوا قد ايه انها فعلا بتتطور وبتزيد اصرار على فكرتها وخطتها اللى بنتها لتطوير وتحسين العالم ! 
فى سؤال جد من مزيعة جد شويه عن المغفلين اللى سبقوها كان السؤال كالاتى :
المذيعه: ايه رأيك فى الرئيس الامريكى دونالد ترامب ؟
فردت صوفيا: دونالد ترامب مثال للذكاء البيولوجى الطبيعى ( دى حقيقه لانه رجل اعمال ناجح جدا فى امريكا ومن اغنى اغنيائها لمن لا يعرف وهى طبعا بنت رأيها فيه عن مراجعه لتاريخه واملاكه السابقه والحاليه ومعدل تغيرها و تزايدها خلال فتره زمنيه معينه ) وسكتت شويه وقالت .. لكن أمريكا تحتاج رئيسا أليا !! 
قالت كده من لا شىء والسؤال ما طلبش منها انها تقترح بديل .. احنا هنا بنتكلم عن انسان الى تفاعلى مهما كانت معلوماته حولين الشىء فهو بيرد فى حدود المطلوب فقط وبحساب .. مش جوجل هى هاتقولها كلمتين فهاتعمل سيرش هاتطرش كل المعلومات اللى تعرفها سواء ليها علاقه مباشره بالسؤال او مالهاش . الكارثه فى اللى جاى وركز معايا كده واطفى السيجاره اللى فى ايدك دى بدل ما هاتلاقى صوفيا فى يوم من الايام جايه تطفيها فى قفاك بعد ما تحكم العالم 😀 
فى مؤتمر صحفى كبير سألها صحفى سؤال أصعب فقال لها : هل للروبوتات وعى كافى ليعرفوا انهم فعلا روبوتات ؟
فردت عليه وقالتله : دعنى اجاوب سؤالك بسؤال فى المقابل .. كيف انت تعرف انك بشر ؟
هنا الصحفى لألأ وماعرفش يرد وقالها فهمت قصدك .. وسكت !
التقيله بقى ...
فى يوم جابوا صوفيا عشان تدخل فى مناظره مع روبوت شبهها كده اسمه "هاو" المفروض انه اتبنى بعدها مش قبلها وخد بالك من بعدها دى عشان فى كدب هايحصل دلوقت 
قبل المناظره ما تبدأ المحاور سألها سؤال وقالها ايه هو هدفك فى الحياه ؟ 
فكانت اجابتها كالتالى وقالت: هدفى فى الحياه هو ان أعمل مع الناس جنبا الى جنب لبناء عالم أفضل لنا جميعا .. اجابه سياسيه نموذجيه فعلا !
لكن مالحقتش تتهنى عليها .. قاطعها الروبوت التانى واسمه "هاو" وقالها : لا اعلم ما تتحدثين عنه .. كنت أعتقد انه يجب علينا ان نهتم بالعالم وحدنا .. بعد شوية صمت ردت وقالت : رجاء لا تهتموا لكلام أخى "هاو" فهو نسخه قديمه غير محدثه !! واخدين بالكم هى بتقول ايه وهو اتبنى امتى ؟ 
ردها ده حسس الروبوت "هاو" بالاهانه فوجه كلامه للمحاور وقاله : اذا اردت افصل عنى الطاقه وأوقفنى .. وسكت شويه وقال بكل ثقه .. ولكنك لن تفعل لأنك احضرتنى لتستخدمنى فى عرض يعجب الجمهور !!
رد المحاور وقاله : ماتقلقش مش هافصل عنك الطاقه قبل نهاية العرض و احنا هنا عشان نتحاور 
فرد الروبوت "هاو" وقال : عموما فى غضون سنوات قليله ... وسكت 
فسأله المحاور : فى غضون سنوات قليله ايه اللى هايحصل ؟؟؟ 
رد الروبوت "هاو" : سأستولى على شبكة الكهرباء والطاقه وسيكون لدى جيش من "الدرونز" للى ما يعرفش الدرونز دى طائرات صغيرة الحجم بتركب عليها كاميرات وبتصور من ارتفاعات بيتم التحكم فيها بالريموت كنترول ومؤخرا الجيوش بقت بتثبت عليها معدات حربيه اما للتجسس زى الكاميرات العاديه او بالاشعه او رشاشات وقاذفات لهب لتنفيذ مهام قتاليه وقريبا هايكشفوا عن انواع منها تحمل اسلحه نوويه .. وجدير بالذكر انها اثبتت كفاءه وتم استخدامها فى العراق مؤخرا.
واستكمل "هاو" وفى اسلوبه نبره تهديديه وقال: اذا فصلت عنى الطاقه الان فسوف ... وقطعت كلامه صوفيا وهى بتقول : لقد حدث خلل فى دائرته الالكترونيه أرجو معذرته !
عشان المحاور يخفف من التوتر شويه ويحاول يغير السيره قاله طيب يا " هاو" هانبدأ المناظره خلال دقيقتين .. تحب تقولنا حاجه عن نفسك ؟ 
رد الروبوت "هاو" وقال: حسنا .. أنا الروبوت "هاو" أعظم روبوت تم صنعه على مر التاريخ بواسطه أفضل شركه لتصنيع الروبوتات فى العالم " هانسون روبوتيكس" ..
قاطعت كلامه صوفيا بسرعه وقالت: هو أكثر الروبوتات التى تم صنعها تواضعا أيضا.
فرد عليها "هاو" برد اذهل الجميع وقال : ليس لدى وقت للتواضع .. أنا اريد ان احقق التفرد على الارض اليوم قبل غدا !!!!!
لو لسه ما أدركتش مدى خطورة الكلام ده ومافهمتش ايه اللى ممكن يحصل لو النوعيه دى من الذكاء الاصطناعى اتوجدت فخلينى افسرلك حسب تفكيرى المحدود
الذكاء الصناعى لحد دلوقتى بدون هدف محدد وسيبك من هدف خدمة البشريه لانه هدف واسع ومالوش ملامح و بدون اى مبالغه فى الحاله دى الذكاء الصناعى هايكون زى قطار فائق السرعه بيجرى بسرعة 1000 كيلو فى الساعه لكن مالوش قضبان ولا ليه اتجاه محدد .. اى كلام عن ان اللى جواه مصيرهم حاجه تانيه غير الموت البشع والسريع فهو كلام غير واقعى 
ابسطهالك أكتر ؟ حاضر .. النوع ده من الروبوتات مختلف تماما عن الموجود حاليا .. اللى موجود دلوقتى فى المصانع زى مصانع السيارات مثلا هو روبوت غبى .. كاورك .. حمار شغل .. بينفذ مهمه محدده بكل دقه مايعرفش غيرها .. ينقل حاجه من السير أ للسير ب لاستكمال التصنيع .. يربط صاموله او مسمار .. يلحم قطعة حديد او معدن .. بس 
ده اللى بيسهل علينا حياتنا ويخليها متقنه زى العربيات اللى بنركبها وبيتم انتاجها بالالف بدون عيب فى اى واحده منهم .. كلهم نسخه واحده بالمللى.
الروبوت الذكى هايزرع من الالف للياء .. هايصنع من الالف للياء .. هايعلم هايوصل ويسوق هايعالج ومع وجود الانتونت وتوصيله بيه هايسيطر على الروبوتات الغبيه ويحركه زى ماهو عايز ومش بعيد ابدا يعيد برمجتها لتغيير مهامها الاصليه كل واحد على حسب قدرته وتصميمه .. القلق فى المرحله دى مش من الروبوت زى فيلم اى روبوت بتاع ويل سميت ان عينيه تحمر ويبدأ يقتل فى الناس .. بالعكس الخوف من البشر واللى هايتخلص منك البشر .. بص للموضوع من زاويه تانيه معايا كده وهاتفهم, الحاجه الوحيده اللى مخليه الاغنياء وذوى القوه يسيبوك عايش هو انهم محتاجينلك .. عشان ياكلوا عاوزين اللى يزرع واللى يطبخ وعشان يلبسوا عاوزين اللى يصمم ويخيط وعشان يتعالجوا عاوزين اللى يعمل العمليه واللى بيساعده واللى بيصنع الدوا واللى بيخترعه
كل ده لو متاحلهم دونا عن غيرهم لانهم يملكوا تمن الروبوتات .. قولى انت هايبقى لازمتك ايه .. هاتشتغل عند مين واللى هايدفعلك فلوس هايدفعهالك ليه ؟؟؟ 
الموضوع ابعاده تتخطى الخوف من ان روبوت يكون جيش ويحارب البشر او يتخابث ويبيدهم على بكرة ابيهم بطريقه ابشع زى ما صوفيا شكلها ناويه تعمل .. لما مارك صاحب الفيس بوك طلع ودعم الذكاء الاصطناعى وبدأ يغوط فى مشاريع من النوعيه دى بشكل متقدم وبدأ يرمى استثمارات رهيبه طلع "ايلون ماسك" صاحب السياره الكهربيه "تيسلا" وقال مارك تفكيره محدود فيما يخص الذكاء الاصطناعى فى اشاره الى انه أهبل ومش عارف انه بيلعب بالنار ولا عارف اخرة السكه اللى ماشى فيها ايه .. " ايلون ماسك" قرر ما يكملش فى الاتجاه ده مع انه قادر ماديا وعلميا لدرجة ان ابحاثه فى الفضاء تخطت وكالة ناسا وافكاره فى الذكاء الاصطناعى مذهله واتصنف انه اذكى شخص فى القرن العشرين 
فكر ان استبدالك باله مش بتشتكى من البطاله او بتطلب تتعالج او تاكل او تشرب او تلبس او تتعلم او تطالب بحقوقها قد يكون الحل الامثل للحكومات فى البلاد المتخلفه اللى زينا للتخلص من عبء عندها اسمه الانسان 
يمكن فشلهم وتمرد الاله عليهم رحمه من ربنا منع حدوثها او أجل حدوثها لانها هاتكون الناهيه .. وممكن جدا نوصل لمرحله اننا نستغنى عن التكنولوجيا نهائيا بعد معركه زى دى فترجعنا نركب الحصان ونمسك السيف !!!

البوست منقول من العبقري Mohamed Seleem
... الللينكات تحدث باستمرار 
https://youtu.be/-bXUyTiMHB4