قبل الثورة
كانت كلمة جاسوس يعني جمعة الشوان ومحمود المصري يعني كنا احنا اللي مجننهم ومطلعين عينهم ولاكان عندنا ولا جاسوس نقول اننا بندور عليه . الا مديحة كامل طبعا والصعود الى الهاوية وكانت مننا وعلينا
بعد الثورة
حنفية الجواسيس اتفتحت وبالدليل من صفحته ع الانترنت
اجري يا عم كل واحد يقفل صفحته احسن ما يروح ع الهاوية او يروح شرم
قبل الثورة
كان كل البنات ف مصر مسنيين العدل
بعد الثورة
· ماحدش مستني حاجة الامر اتحسم ويا بنات مصر انسوا الجواز بعد الدعوة لمقاطعة الجواز من بنات مصرعشان يتحرر رجالة مصر من قيود ستات سوزان مبارك والمجلس القومي للمرأة وده كان في بيان حركة ثورة رجال مصر التي تدعو لمفاطعة الزواج من مصريات ....وخليها تنفعهم...
كأس افريقيا كانت الحاجة الوحيده اللي بتفرحنا ونرسم لها علم مصر
بعد الثورة
ولاتفرق معانا ان تم انتخاب مصر لعضوية مجلس ادارة منظمة العمل الدولية في جنييف من 2011 الى 2014
هوه احنا فاضيين للعمل مش وقته يا جدع صحيح مش هندخل البطولة ... بس ولا يهمنا... برضه هنرسم علم مصر
قبل الثورة
حوارات محفوظة ومكررة مع اي مسئول
بعد الثورة
نموذج حوار مع رئيس حزب( افتراضي ) احنا بتوع ورق البردي
بصراحة كل يوم نسمع عن احزاب وبرامج وقررنا نوعي الجمهور بكل حزب عشان نفهم ونتنور
ضيفنا الاستاذ فاهم ابوالكراريس
قولنا يا استاذ فاهم يعني ايه اهداف الحزب وليه اصلا ما نضمتش لحزب من الاحزاب الموجودة ؟
لا الاحزاب الموجودة كلها مليانه فلول او بتعبر عن قلة مندسة او اجندات اما حزبنا فهو يرفض كل الكلام ده احنا عايزين نرجع للاصالة المصرية ده احنا بتوع ورق البردي وده اسم حزبنا .. واللي عايز ينضم لنا يوصل لغاية الفجالة ويسأل عننا ... عايزين نرجع تاني للكشكول ابو سلك والكراسات بانواعها 9 اسطر ....صفحة وصفحة .. رسم .. ونزود ف موضوع الرسم ده عشان ما حدش يحاول يترسم علينا
بصراحة كده ما عندكوش خطط لترشيح حد من حزبكم للرئاسة؟؟؟
الكلام ده سابق لاوانه لكن عشان الشفافية ...اه عندنا.... لاننا محتاجين حد من قلب الشعب كفاية كده ع النخبة .. نشد احنا شوية ...وبدأنا بالالتحام بالجماهير في الاتوبيسات والقطورات والميكروباسات عشان نشرح برنامجنا .. ومرشحنا مش هيسكن لا ف فيللا ولا قصر هيقعد ف الفجالة نفس بيته جنب مقر الحزب الحاكم ان شاء الله .. ينزل يشرب الشاي ع القهوة من غير حرس ولامصاريف .. يستقبل الضيوف الاجانب في اي فندق نضيف مستوى يعني ... احنا بنمر بمرحلة صعبة وكفاية المراحل الصعبة اللي مر بيها الشعب عايزين رئيس يمر بمرحلة صعبة ويتقشف هوه شويه كفاية الشعب قشف طول 30- 40 سنة
وايه خطط العمل واليات التنفيذ للكلام ده يا استاذ؟؟
كل يوم خطط وتنفيس لازم ننفس عن الشعب ..... وكل يوم قيادات و اعضاء الحزب ع القهوة مؤتمرات مباشرة مع الناس وكلها تنفيس
طيب احنا كمان ناخد فاصل للتنفيس
============================
قبل الثورة
امتحانات حسب المنهج ومسابقات المعلومات العامة تشكيلة سلاطه بلدي
بعد الثورة
الامتحانات والمراجعه النهائية
سؤالنا يدمج بين اللغة الانجليزية والسياسة والتاريخ عشان الوقت كله بفلوس فلازم نختصر
اكتب الاجابة الصحيحة
من وضع التعريف الدقيق للديقراطية ؟؟؟
1- اليونانيون
2- المصريون القدماء
3- رئيس عربي كان يتحدث عن الديمو والكراسي
كلمة واحدة بالانكليزية تدل على على معنى مشترك بس بيضحكوا علينا انه معنيين
ما معني كلمة بارتي what is the meaning of Party???
1- كلمة في اغنية لسعاد حسني
2- بارتي يعني حزب
3- بارتي يعني حفلة
4- التلاتة كلهم
وفي الاخر
سؤال الجمهور
يا استاذ .. يعني ايه حقوق الانسان؟؟؟
والاجابه :حقوق الانسان دي تلاقيها ف اي مول .. زمان كان فيه منها جاهز وفيه تفصيل لان مش اي حقوق هتمشي على اي انسان... دلوقتي ولما كل المقاسات اتغيرت من السمنة والنحافة بقت كلها تفصيل
السؤال الختامي :
هو احنا قبل الثورة وللا بعدها ؟؟؟؟
اعذروني اتلخبطت....
بعد الثورة مازلنا نحتاج الثورة بل اشد احتياجا لجوهر الثورة ومقاومة خطط تشويه الثورة وتفريغها من مضمون اساسي قامت لاجله
