ساعة الهوجه العقول تطيش 
وتبقى اخلاق الخلايق مفيش 
نموّت ونحرق ونسرق وننهب 
ومن غير منعرف ليه.. بنضرب
والباشوات يصبحوا حرافيش
لو نفسك تشوف العقول حقيقى
وتحكم عليها يا صديقى
إستنى يبقى القانون مفيش 
ساعتها تشوف صحيح العجايب
وتعرف إن اكترنا خايب
والكل بينهب حتى الشاويش
أنا شفت فى الهوجه ناس كتير
كان كل كلامهم عن الضمير
وساعتها ولا اجدع بياعين حشيش
واخينا اللى بيصلى معايه 
ودايما قدامى مهواش ورايه 
ألقاه ساعتها شايلّو شيش 
ليه فى الزحمه بنلغى عقولنا  
ونرجع نندم ع اللى جرالنا 
ونشوف المكاسب منلاقيش
أنا بقول الحقيقه كالعاده 
ومحدش يزعل منى يا ساده
من غير الصراحه معرفش اعيش
منير خاطر

 

المصدر: بقلم الشاعر// منير خاطر// ساعة الهوجه
  • Currently 0/5 Stars.
  • 1 2 3 4 5
0 تصويتات / 69 مشاهدة
نشرت فى 30 مايو 2016 بواسطة Cleobatra

عدد زيارات الموقع

55,652