عزرا ليكوا يا اهلى وناسى

أنا هتكلم بقى ومخفش
قبل ما عقلى يطير من راسى
حوشوا عنى مشايخ الدش
همه سبب أى مآسى
كده صدقنى وش فوش
بين شيعه وسنه بنآسى
دول خلوا حياتنا بقت مش
فيهم ناس تجرح احساسى
وناس بتعلمنا الغش
ومشايخ قاعده على كراسى
بالبنزين ع النار بترش
ومليت من فتاويهم كراسى
جايبينهالنا منين معرفش
والخناقات بينهم ليلاتى
خلتنى م الأديان راح اكش
واحد يقول دا شيخ قرداتى
والتانى يقول مفجوع وبكرش
انا عمرى مشفت ف حياتى
شيخ متعبى وبيتفش
واللى اكتشفوا انو فلاتى
وحريم السلطان ولا نعرفش
واخينا ليل ونهار بيهاتى
يا تصدقنى يا هتتحش
اصدق مين فيهم يا اخواتى
وانا كدا كدا فى النار راح اخش
وناس كتير زى حالاتى
لكن ساكته متتكلمش
خلونى حسدت العجلاتى
لو يسمعهم مبيفهمش
انا لما بتسالنى حماتى
بقول مشايخنا بيحرقوا ف الأش
سيبك منهم يا ام زناتى
واعبدى ربك من غير غش
وانته كمان يا عم نجاتى
سد ودانك ومتسمعش
منير خاطر