بمناسبة العيد، كل سنة وأنتم طيبين يااااااارب...

وبهذه المناسبة السعيدة لازم نتكلم عن المشكلة الأزلية بين الأزواج.. هنزور أهل مين الأول؟!
وطبعا المشكلة بتكون أكبر في أول سنة زواج حتى يتم الاتفاق بين الزوجين، ولكن في بعض الحالات تستمر الخناقات في كل عيد بدون رحمة..

المهم هدخل في الموضوع من غير رغي كتير.. قبل العيد بكام يوم كان الصدام الأول بيني وبين هاني..

بدأت الحكاية عندما كنا في زيارتنا الأسبوعية لأهل هاني..

والد هاني: كل سنة وأنتم طيبين خلاص العيد على الأبواب.
وأنت طيب يا عمي، إن شاء الله يبقى عيد سعيد علينا كلنا
والد هاني: هتعمل إيه العيد دا يا هاني؟ دا أول عيد وأنت متجوز يا حبيبي هاني: ولا حاجة عادي يا بابا، أكيد هنيجي نقعد معاكو شوية ونروح لأهل هدى ولما سمعت حماتي رد هاني غضبت جدا ووشها أحمر وكأنها هتبدأ خناقة...

يعني إيه يا ابني أنت خلاص هتنسى أهلك بسرعة كده.
ليه بس يا ماما إيه اللي مضايقك؟
كلامك .. إزاي أول يوم ما تقضيهوش كله معانا إحنا مش برضوا أهلك

ساعتها بصراحة ما أقدرتش امسك لساني كانت خلاص مرارتي هتتفقع.

يا طنط ما هو إن شاء الله هيجيلك إحنا ما نقدرش نستغنى عنك دا أنت الخير والبركة، بس أنا كمان لازم أروح لأهلي أول يوم العيد.

طيب وإيه اللي مانعك، أنت روحي لأهلك وهاني يجيي يقضي اليوم معانا..

وكانت الصدمة شديدة عليا إزاي أبقى أنا وجوزي أول يوم العيد كل واحد في حتة، وتمالكت أعصابي بصيت لهاني ولكن هاني فضل السكوت، وجدت أن ما فيش مفر لازم أرد طيب يا طنط ما المفروض هاني يجيي معايا عشان نبقى مع بعض.

ما أنتو على طول مع بعض أنت مستخصرة يقضي العيد معايا.

وبعد المناقشة الطويلة وجدت أني "بنفخ في قربة مقطوعة" سكت وأنتهت المناقشة على كدة، وأما روحنا البيت سألت هاني..
أنت يا هاني موافق على كلام طنط أنت ما ردتش خالص..
ما هي مامتي ولازم أرضيها، أنا حاسس أنك متحاملة عليها.
أنا يا هاني متحاملة عليها إزاي؟ أنا عايزة بس أزور أهلي في العيد إحنا ممكن نزورهم تاني يوم مش هتبقى فيه مشكلة
لأ طعا في مشكلة وأكيد زي ما أنت عايز تروح لأهلك انا كمان عايزة أزورهم، وأظن أن دا حقي.

بس أنا برضه مش هغضب أمي علشان خاطرك
أنا ما قلتش تغضبها بس دا ما يكنش على حسابي وحساب أهلي، حاول تقنعها وتكلمها بأسلوب حلو عشان تأثر عليها، أنا شايفة أننا نقسم اليوم بين العلتين أفضل حل بدل ما نظلم أي طرف وكمان عشان ما يكنش كل واحد فينا في حتة.. أنا عايزة أفضل معاك..

وبعد كام يوم من التفكير والمشاورات مع حماتي العزيزة وتدخل قوات التحالف وحفظ السلام وصلنا إلى تقسيم اليوم بين الأهلين..لكن طبعا نروح الأول لحماتي، قلت وإيه يعني المهم أني هروح لأهلي في الأخر .

الحمد لله أتحلت المشكلة أخيرااااااااااااااااااااااا

وجاء اليوم المنتظر وذهبنا لحماتي وصلى هاني العيد مع والده، ولكن كانت حماتي متضررة من الاتفاق وحاولت أن أكسبها وأتغاضى عن معاملتها لي" وكأني عملت مصيبة" أعمل الخير، واللي عند ربنا ما بيضعش...

والحمد لله عدي اليوم على خير طبعا بغض النظر عن محاولات حماتي المستميتة لتعطيلنا عن النزول لأهلي..

يلا كفاية عليكو كدا دلوقتي وكل عام وأنتم بخير...